تورخم دروازه په اتمه ورځ هم د هر ډول تګ راتګ پر مخ تړلې ده

جلال‌اباد (پژواک، ۱۱ کب ۱۴۰۳): د ننګرهار سیمه‌ییز چارواکي وايي، نن اتمه ورځ هم پاکستان د تورخم دروازه د هر ډول تګ راتګ پر مخ تړلې ده او دواړو خواوو ته یې ناروغانو، مسافرو او سوداګرو ته ستونزې جوړې کړې دي.

دغه لاره یوه اونۍ مخکې پاکستاني چارواکو د افغان ځواکونو له لوري د تاسیساتو د جوړولو په غبرګون وتړله او لا هم د افغان چارواکو مذاکراتو پایله نه ده ورکړې.

د ننګرهار د مومندرې ولسوالۍ اړوند په تورخم ښارګوټي کې د اطلاعاتو او فرهنګ لوی مدیر عرفات مهاجر نن پژواک خبري اژانس ته وویل چې د تورخم دروازه نن اتمه ورځ هم د هر ډول تګ راتګ پر مخ تړلې ده.

دی وايي، تېره اونۍ څو ځلې له پاکستاني اړخ سره په صفري نقطه کې مذاکرات وشول خو کومه پایله یې ورنکړه او لاره همداسې تړلې ده.

دی وایي، دواړو خواوړ ته ګڼ ناروغ لرونکي، مسافر او سلګونه لاریو کې بار سوداګریز توکي د لارې د تړل کېدو له امله بند پاتې دي.

هغه له خلکو غواړي چې تورخم ته دې د لارې تر خلاصونه له تګ ډډه وکړي.

پاکستان په ځلونو په بېلابېلو پلمو د تورخم لار د ترانسپورټ او ترانزیټ پر مخ تړلې او خلکو ته یې ستونزې جوړې کړې دي.