میدانښار (پژواک، ۹ زمری ۱۴۰۴): د میدانوردګو ولایت د کلیو پراختیا او بیارغونې ریاست وایي چې په دغه ولایت کې د ۱۲،۶ میلیون افغانیو په لګښت د درېیو رغنیزو پروژو چارې پیل شوې.
د میدانوردګو د کلیو پراختیا او بیارغونې ریاست د تطبیق چارو امر محمد سلیم بریالي پژواک خبري اژانس ته وویل چې دا پروژې د جغتو ولسوالۍ په ابطله او ادینه کلیو کې پلې کېږي چې پهکې دوه لس متري پلونه او ۶،۸ کیلومتره کلیوالي سړک شامل دي.
هغه زیاته کړه چې یادې پروژې د نړۍوال بانک په مالي ملاتړ او د (UNOPS) موسسې په تخنیکي همکارۍ پلې کېږي او ۱۲.۶ میلیونه افغانۍ لګښټ پرې راځي.
د بریالي په خبره، د دغو پروژو چارې به د درېیو میاشتو په موده کې بشپړې شي او د کار په جریان کې به یې لسګونو کسانو ته د کار زمینه برابره شي.
نوموړي دا هم وویل چې د پروژو له بشپړېدو سره به د جغتو ولسوالۍ د خلکو ترانسپورټي ستونزې په اساسي ډول حل شي.
GET IN TOUCH
NEWSLETTER
SUGGEST A STORY
PAJHWOK MOBILE APP