کابل (پژواک، ۲۵ چنګاښ ۱۴۰۵): د راپورونو له مخې، د میانمار سواحلو کې د دوو کښتیو ډوبېدو له المه د روهینګیا مسلمانانو په ګډون څه باندې ۵۰۰ کسان نادرکه یا مړه شوي، خو د پېښو او قربانیانو کره شمېر لا په رسمي ډول نه دی تایید شوی.
رویټرز راپور ورکړی چې د کډوالۍ نړیوال سازمان (IOM) او د کډوالو په چارو کې د ملګرو ملتونو عالي کمېشنرۍ (UNHCR) نن (پنجشنبه) په یوه ګډه اعلامیه کې ویلي چې دغو دوو کښتیو د جون میاشتې په وروستیو کې د میانمار له راخین ایالت څخه حرکت کړی و او ډېری سپرلۍ یې د روهینګیا مسلمانان وو او د بنګلهدېش په کمپونو کې مېشت یو شمېر کډوال هم په کې شامل وو.
په اعلامیه کې د لومړنیو معلوماتو له مخې راغلي چې په دغو دوو پېښو کې څه باندې ۵۰۰ کسان نادرکه یا مړه شوي، خو تر اوسه دغه پېښې او د قربانیانو کره شمېر په رسمي ډول نه دي تایید شوي.
د راپور له مخې، لومړۍ کښتۍ چې شاوخوا ۲۵۰ سپرلۍ یې لرلې، له حرکت لږ وروسته ورسره اړیکه پرې شوې او دویمه کښتۍ چې شاوخوا ۲۸۰ کسان یې لېږدول، داسې انګېرل کېږي چې د جولای په اتمه د میانمار د ایراوادي ساحلونو ته نږدې ډوبه شوې وي.
ملګرو ملتونو خبرداری ورکړی چې دغه سفرونه د سمندري تګراتګ له عادي موسم څخه بهر ترسره شوي او خرابو هوايي شرایطو د دې لارې خطر په څرګند ډول زیات کړی دی.
د راپور له مخې، روهینګیایان چې په میانمار کې له کلونو راهیسې له تاوتریخوالي، بېځایه کېدو او د تابعیت له حقونو د محرومیت سره مخ دي، مالیزیا، اندونیزیا او تایلنډ ته د رسېدو لپاره هر کال په کوچنیو او ناامنو کښتیو کې د اندامان له سمندر او د بنګال له خلیج څخه تېرېږي.
په راپور کې د ملګرو ملتونو له قوله راغلي چې تېر کال د اندامان په سمندر او د بنګال په خلیج کې نږدې ۹۰۰ روهینګیا کډوال مړه یا نادرکه شول چې له امله یې دغه لاره په نړۍ کې د کډوالۍ تر ټولو مرګونې سمندري لاره بلل شوې ده.
سرچینې لیکلي چې د روان میلادي کال له پیل راهیسې هم د روهینګیایانو او بنګلهدېشي وګړو په ګډون نږدې ۳۰۰ کډوال پر دې لاره نادرکه یا مړه شوي دي.
