امنیت او جرمونه

بلخ کې ځایي مسوولین وایي چې د روان کال له پیله یې د دغه ولایت په چهارکنت ولسوالۍ کې شپږ زره جریبه غصب شوې ځمکه بېرته راګرځولې ده.

د پنجشېر امنیه قومانداني وايي چې د دغه ولایت په رخه ولسوالۍ کې یې دوه «غله» له یوه اندازه سرو زرو او یو میل تومانچې سره نیولي.

د ننګرهار امنیه قومانداني وايي چې د دغه ولایت په پچیراګام ولسوالۍ کې یې د یوه کس د وژلو په تور پنځه کسان نیولي دي.

د پېښو پر وړاندې د چمتووالي ملي اداره وايي چې روان ميلادي کال په هېواد کې ۱۵۲ کیلومتر مربع ځمکه له ماینونو او ناچاوده توکو پاکه شوې او زیاتوي چې په دې موده کې د دغو توکو په چاودنو کې ۱۴۹ کسانو ژوند له لاسه ورکړی او ۴۰۴ نور ټپیان شوي دي.

د ننګرهار ولايت د سره‌رود ولسوالۍ د يو اوسېدونکي جسد چې دوه‌نیم کاله مخکې د انسان‌تښتونکو له لوري تښتول شوی و، پرون موندل شوی او خپلې کورنۍ ته سپارل شوی دی.

د سرپل امنیه قومانداني وايي، د دغه ولایت په مرکز کې د څرځایونو پر سر شخړه کې یوولس کسان ټپیان شوي دي.

پکتیا کې باوري سرچینې وايي، د تېرې شپې په نښتو کې پاکستاني لوري ته «ډېره مرګ‌ژوبله اوښتې» او د دغه ولایت په ډنډپټان ولسوالۍ کې د پاکستاني ځواکونو په ډزو کې هم درېیو ملکي وګړو ژوند له لاسه ورکړی او دوه نور ټپیان شوي دي.

د پروان امنیه قومانداني د دغه ولایت په مرکز کې د یوه ښوونکي د وژلو په تور د دوو کسانو د نیول کېدو خبر ورکوي او وايي، له هغوی څخه وسلې هم ترلاسه شوې دي.

د افغانستان دفاع وزارت وایي، د هېواد د جنوب‌ختيځ له استقامته د فرضي کرښې بلې خوا ته پر ځینو هغو پټنځایونو او مرکزونو انتقامي بریدونه شوي له کومو چې په افغانستان کې بریدونو تنظيمېدل.

د کابل امنیه قومانداني وایي، د شېخ زاهد روغتون ته څېرمه په سړک چاودنه شوې چې له امله یې څلور تنه عام هېوادوال سرسري ټپیان شوي دي.

خايي سرچينو پژواک خبري اژانس ته وویل چې د خوست عليشېرو او د پکتیا ډنډپټان ولسواليو ته څېرمه پر ډیورنډ فرضي کرښه د افغان او پاکستاني ځواکونو ترمنځ نښته شوې ده.

د ملګرو ملتونو د ماشومانو د ملاتړ صندوق (یونیسف) وایي، د پکتیکا په برمل ولسوالۍ کې د پاکستان په هوایي بریدونو کې لږ تر لږه ۲۰ ماشومانو خپل ژوند له لاسه ورکړی دی.