احمدشاه عرفانیار

د هرات له زلزله‌ځپلو او له پاکستانه راستنو شوو افغانانو سره د مرستې لپاره د ترکيې څه باندې ۵۰۰ ټنه خوراکي او غيرخوراکي توکي هرات ته راورسېدل.

تېره اونۍ ا.ا مسکو کې د ځینو افغان سیاستوالو د ناستې په تړاو اعتراض وکړ او یوه ایراني چارواکي ویلي چې له داعش سره د مبارزې لپاره د افغانستان او سیمې ترمنځ امنیتي همکاریو ښه پایله لرلې ده.

د ا.ا امارت ویاند وایي، د پاکستان له لوري پر افغان کډوالو د تازه فشارونو له پیل راهیسې تر اوسه څه باندې ۴۰۰ زره افغان کډوال له دغه هېواده را ایستل شوي دي.

د کابل امنیه قومانداني وايي، د کابل ښار اتمې امنیتي حوزې اړوند سیمه کې د اووه عشاريه درې ميليون افغانیو د غلا په تور شپږ وسله‌وال کسان نيول شوي دي.

تېره اونۍ، یو ځل بیا بېلابېلو سرچینو له پاکستانه د افغان کډوالو په زور ایستل ناسم اقدام وباله او د ملګرو ملتونو سرمنشي وویل چې افغانستان باید یو ځل بیا په نړۍوال نظام کې مدغم شي.

د برېښنا شرکت وايي، د افغانستان برېښنا شرکت دوو پروژو د اسیا په کچه د کورنۍ برېښنا پروژو په کلني نندارتون کې نړۍواله جایزه ترلاسه کړه.

کابل کې د ترکیې نوي شارژدافیر د کورنیو چارو وزارت له سرپرست سره په تعارفي ليدنه کې د هرات له زلزله‌ځپلو سره له بشري مرستو بار رېل‌ګاډي د راتلو خبر ورکړ او وایي چې هېواد یې په سختو حالاتو کې د افغانانو تر څنګ درېدل خپله وجیبه ګڼي.

اروپايي ټولنې افغانستان کې د بشردوستانه مرستو لپاره ۶۰ میلیونه یورو او پاکستان کې له افغان کډوالو سره یو میلیون یورو مرسته اعلان کړه.

د کابل امنیه قومانداني وايي، د کابل ښار اتمې امنیتي حوزې اړوند سیمه کې یې پنځه کسان د دولتي تېلو او دوه نور د موټرو او بايسکلونو د غلا په تور نيولي دي.

رییس‌الوزراء اړوندو ادارو ته امر کوي چې د راستنېدونکو افغان کډوالو د ستونزو هواري لپاره ټول امکانات وکاروي او له پاکستانه غواړي چې د افغان کډوالو له ځورولو لاس واخلي.

د پاکستان د لوړو زده‌کړو کمېسیون وایي، د علامه محمداقبال تحصلي بورسونو په درېیم پړاو کې افغان محصلینو ته د درېیو کلونو په موده کې ۴۵۰۰ سکالرشیپونه ورکوي.

حزب اسلامي له پاکستان او ایرانه غوښتي چې د افغان کډوالو ایستل ودروي؛ د ښه ګاونډیتوب پولې دې پر دښمنۍ نه بدلوي او داسې تګلارې دې نه غوره کوي چې نفرتونه او دښمنۍ زېږوي.