نورالله ځاځی

د یوناما سیاسي برخې مسوول ويلي، په هڅه کې دي د خبرو له لارې د افغانستان او نړۍوالې ټولنې ترمنځ مثبتې اړیکې او د باور فضا رامنځته کړي او د بحث وړ لویو موضوعاتو ته اساسي حل‌لارې ولټوي.

د ریاست‌الوزراء سیاسي مرستیال وايي چې اسلامي امارت له ګاونډیو او نړۍوالو هېوادونو سره نېکې اړیکې غواړي، خو د اسلام پر اصولو سودا ته هیڅکله حاضر نه دی او نه به د نورو د خوښۍ لپاره اسلامي شعائر تر پښو لاندې کړي.

د کډوالو او راستنېدونکو چارو وزارت وايي چې د پاکستان له زندانونو ۳۰ افغان بندیان ازاد او هېواد ته راستانه شول.

د ترانسپورټ او مالیې وزارتونو او د افغان پُست دولتي شرکت ترمنځ په ترانزیټي باروړونکو موټرو کې د ځېرک قفل (جي‌پي‌اېس لاکر) لګولو تړون لاسلیک او همدارنګه د پُستي کوډ او پُستي ادرسونو د پراختیا ملي پروګرام پیل شو.

د اسلامي امارت سیاسي کمېسیون د سترو سیمه‌ییزو پروژو عملي کولو،  د سرحدي سیمو امنیتي او ټولنیز وضعیت د لا ښه‌والي او له یو شمېر هېوادونو سره د سیاسي اړیکو د پیاوړتیا په اړه بحث کړی دی.

د ریاست‌الوزراء اقتصادي معاونیت وايي، ملي تدارکاتو کمېسیون د شاوخوا لس میلیارد افغانیو په ارزښت د ۱۲ پروژو تړونونه منظور او د ۱۵ نورو یې تعدیل کړي دي.

د روسیې د بهرنیو چارو وزیر د مسکو فارمټ شپږمې ناستې په څنډه کې له مولوي امیرخان متقي سره لیدلي او ټينګار یې کړی چې د افغانستان د مرکزي بانک کنګل شوې زېرمې دې ازادې او له افغانستان سره تعامل باید له نورو چارو سره ونه تړل شي.

مسوولین وايي چې په فراه، کونړ او لغمان ولایتونو کې د څه باندې ۱۶ میلیون او ۹۵۰ زره افغانیو په لګښت د درېیو چک‌ډیمونو جوړولو چارې بشپړې شوې.

پېښو ته د چمتووالي او رسېدنې ملي اداره وايي چې په تېرو لسو ورځو کې د افغانستان په اتو ولایتونو کې د بارانونو، سېلابونو، تالندې او اورلګېدنې له امله ۱۳ کسان مړه او ۱۶ نور ژوبل شوي دي.

د اقتصادي کمېسیون د تخنیکي کمېټې د یوې کړنلارې له مخې به د اوبلن ګاز ټول دولتي او خصوصي شرکتونه خپلې د ګازو زېرمې له ښارونو او د ګڼې ګوڼې له ځایونو وباسي او په ټولو معیارونو برابر به نوي تاسیسات ورته جوړوي.

د افغانستان د ټولګټو وزارت وايي، په تېره وږِي میاشت کې د اوسپنې پټلیو له لارې څه باندې ۳۱۷ زره مټریک ټنه انتقالات شوي دي.

راپورونه وايي چې د اسرائیل له لوري پر لبنان تاز هوایي بریدونو کې څه باندې ۱۰۰ کسان وژل شوي او ۳۵۹ نور ټپیان دي.