<p style="text-align: justify;">کابل (پژواک، ۱۹ تله ۱۴۰۳): د ریاستالوزراء سیاسي مرستیال وايي چې اسلامي امارت له ګاونډیو او نړۍوالو هېوادونو سره نېکې اړیکې غواړي، خو د اسلام پر اصولو سودا ته هیڅکله حاضر نه دی او نه به د نورو د خوښۍ لپاره اسلامي شعائر تر پښو لاندې کړي.</p>
<p style="text-align: justify;">له ارګ څخه په خپره شوې خبرپاڼه کې راغلي چې د ریاستالوزراء سیاسي مرستیال مولوي عبدالکبیر یادې څرګندونې تېره ورځ په سپېدار ماڼۍ کې د کابل پوهنتون د ټولنیزو علومو پوهنځي د افغانستان پېژندنې ماسټرۍ برنامې له مسوولینو او محصلینو سره په لیدنه کې وکړې.</p>
<p style="text-align: justify;">خبرپاڼه کاږي، په دې لیدنه کې د ټولنیزو علومو پوهنځي رییس پوهنمل حسین احمدزي د یاد پوهنځي په اړه د ریاستالوزراء سیاسي مرستیال ته معلومات ورکړل او زیاته یې کړه چې په دغه پوهنځي کې د افغانستان پېژندنې د ماسټرۍ پروګرام تازه پیل شوی چې لومړنۍ دوره فارغ کادرونه به ټولنې ته وړاندې کړي.</p>
<p style="text-align: justify;">نوموړي وویل، د دغه پروګرام مسوولین او محصلین هڅه کوي د خپلو علمي څېړنو او کنفرانسونو پر مټ نړۍ ته د افغانستان رښتینی انځور وړاندې کړي.</p>
<p style="text-align: justify;">هغه زیاته کړه، په یاده برخه کې دې اسلامي امارت د دوی لاسنیوی او ملاتړ وکړي.</p>
<p style="text-align: justify;">د خبرپاڼې په حواله، د کابل پوهنتون د ټولنیزو علومو استاد ډاکټر فیضمحمد ځلاند وویل، د خوښۍ ځای دی چې د پوهنتون استادان او محصلین کولی شي له خپلو مسوولو چارواکو سره خپلې علمي لاسته راوړنې او ستونزې شریکې کړي.</p>
<p style="text-align: justify;">نوموړي غوښتنه وکړه چې ځوانو کادرونو ته دې د افغانستان په سیاسي لیدلوري او مسلکي برخه کې د جذب زمینه برابره شي.</p>
<p style="text-align: justify;">دوی له اسلامي امارته د تاریخ او فرهنګ ملي کمېسیون د جوړېدو غوښتنه وکړه، څو د افغانستان فرهنګ او تاریخ ژوندی وساتي.</p>
<p style="text-align: justify;">د ریاستالوزراء سیاسي مرستیال په دغه لیدنه کې وویل، اسلامي امارت د اسلامي نظام د ټینګښت او تقویت ترڅنګ په سیاسي او اقتصادي میدان کې د افغانستان ځلولو هڅه کړې چې دا مهال اسلامي امارت په بېلابېلو هېوادونو کې ۴۰ رسمي استازولۍ لري او له نړۍ سره تعامل مثبت لور ته روان دی.</p>
<p style="text-align: justify;">دی وايي، اسلامي امارت له ګاونډیو او نړۍوالو هېوادونو سره نېکې اړیکې غواړي خو د اسلام پر اصولو سودا ته هیڅکله حاضر نه دی او نه به د نورو د خوښۍ لپاره اسلامي شعائر تر پښو لاندې کړي.</p>
<p style="text-align: justify;">د ریاستالوزراء سیاسي مرستیال زیاته کړه، اسلامي امارت د هیچا په کورنیو چارو کې لاسوهنه نه کوي او نه بل چا ته د افغانستان په داخلي چارو کې د لاسوهنې اجازه ورکوي.</p>
