بدخشان کې د کرنیزو اوبو د مدیریت ۲۲ پروژې ګټې اخیستنې ته وسپارل شوې

فیض‌اباد (پژواک، ۴ مرغومی ۱۴۰۳): بدخشان کې ځايي مسوولین وايي، د دغه ولایت په اتو ولسوالیو کې د څه باندې ۳۹ میلیون افغانیو په ارزښت د کرنیزو اوبو د مدیریت ۲۲ وړې پروژې بشپړې او ګټې اخیستنې ته وسپارل شوې.

د بدخشان د کرنې، اوبو لګولو او مالدارۍ رییس مولوي امان‌الله حسن پژواک خبري اژانس ته وویل، یادو پروژو کې د کانالونو، سربندونو او استنادي دیوالونو جوړول شامل دي چې د ۳۹ میلیون او ۸۸۴ زره افغانیو په لګښت په ارګو، کشم، درایم، یفتل پایان، شهدا، بهارک، وردج او زیباک ولسوالیو کې پلي شوې دي.

هغه زیاته کړه، د یادو پروژو لګښتونه د ناروې کمېټې له لورې ورکول کېږي او د کرنې، اوبولګولو او مالدارۍ ریاست په مرسته پلي شوې دي.

د هغه په خبره، یادو پروژو د شاوخوا ۱۳ زره او ۹۳۸ جریب ځمکې د کرنیزو اوبو د کموالي ستونزه حل کړې او د کرنیزو محصولاتو د ډېروالي لامل به شي.

ورته مهال، کروندګرو د یادو پروژو په پلي کېدو خوښي څرګنده کړه او د لویو پروژو او د اوبیزو سرچینو د مدیریت برخه کې یې د حکومت د لا ډېرې پاملرنې غوښتنه وکړه.

د بهارک ولسوالۍ یو کروندګر محمدانور وايي، یوازینۍ ننګونه یې د کرنیزو اوبو په برخه کې ده چې له نیکه‌مرغه د بل سربند په جوړېدو سره به یې کرنیزې اوبه بیا نه قطع کېږي.

هغه له اسلامي امارته غواړي چې د کوکچې او وردوج سیندونو پر سر بندونه جوړ کړي څو هغوی او د ګاونډیو ولسوالیو کروندګر د کښت په فصل کې د کرنیزو اوبو کمښت سره مخ نه‌شي.