نورالله ځاځی

د کډوالو چارو وزارت وايي، په تېر یو کال کې له ایران، پاکستان او یو شمېر نورو هېوادونو یو میلیون او ۸۷۰ زره افغانان هېواد ته راستانه شوي او دا مهال د ګاونډیو په ګډون یو شمېر عربي هېوادونو کې څه باندې ۱۶ زره افغانان بندیان دي.

د افغانستان د عامې روغتیا وزارت وايي چې نن د هېواد په پنځو ولایتونو کې د ماشومانو د پولیو یا ګوزڼ ضد واکسین څلور ورځنی کمپاین پیل شو.

د کورنیو چارو وزارت وايي، په پکتیا او پکتیکا ولایتونو کې د څو قومونو ترمنځ د ځمکې او غرونو د ملکیت پر سر له اوږدې مودې راهیسې روانې شخړې او بدۍ حل او هوارې شوې.

د ترکمنستان بهرنیو چارو وزیر ویلي، هېواد یې چمتو دی چې له افغانستان سره د خپلو سیاسي او اقتصادي اړیکو پراخولو په موخه په نږدې راتلونکي کې د افغانستان په خاوره کې د ټاپي پروژې کارونه پیل کړي.

د ا.ا د مشر په فرمان کې راغلي، که امارتي منسوب او یا مسوول له موجه عذر پرته لمونځ په جماعت سره اداء نه کړي، لومړی دې ورته توصیه وشي او د تکرار په صورت کې دې له حنفي فقهې سره سم په مناسب شکل تعزیر کړل شي.

د کابل ښاروالي وايي چې د کابل ښار ۲۲مه ناحیه کې د ۱۹ میلیون افغانیو په لګښت د دوو فرعي سړکونو جوړولو چارې بشپړې شوې.

د مخابراتو او معلوماتي ټکنالوجۍ وزارت سرپرست ویلي چې د پکتیکا ولایت په ځینو سیمو کې ۲۵ مخابراتي سایټونه جوړیږي.

د احصایې او معلوماتو ملي اداره وايي چې په تېر یوه کال کې یې د افغانستان په کچه څه باندې درې میلیون کسانو ته برېښنایي پېژندپاڼې وېشلې دي او د بېلابېلو خدمتونو له درکه یې څه باندې دوه‌نیم میلیارده افغانۍ عواید راټول کړي دي.

د افغانستان بانک وايي، په سوداګریزو بانکونو کې محدودیت نور هم کم شوی، اوس د افغانیو انفرادي حساب ‌لرونکي په اونۍ کې ۱۵۰ زره افغانۍ او ډالري حساب لرونکي تر دوه زره ډالرو پورې ایستلی شي چې دغه رقم مخکې ۷۰ زره افغانۍ او زر ډالر وو.

د کابل ښار دوولسمې ناحيې اړوند د محبس له څلور لارې تر سليم‌کاروان سړک پورې د څه باندې ۱۰۷ میلیون افغانیو په لګښت د سړک جوړولو چارې پیل شوې.

د ا.ا د مشرتابه د حکم له مخې، د ټولو هوټلونو او سیار رسټورانټونو د انتفاعي مالیې کچه دوه سلنې ته ټیټه او دغه راز د ګاز او تېلو پمپ سټېشنونو د في لېتر ثابته مالیه ۰،۳ افغانیو ته ټیټه شوه.

د صنعت او سوداګرۍ وزارت وايي، یوه چیني شرکت ویلي، چمتو دی چې د ۲۰ میلیون ډالرو په پانګونې سره افغانستان ته باروړونکي موټر او سکواټورونه وارد کړي.