احمدشاه عرفانیار

د غزې روغتيايي چارواکي وايي، په تېرو ۴۸ ساعتونو کې د اسرائیل بریدونو کې د ښځو او ماشومانو په ګډون ۷۷ فلسطینیانو خپل ژوند له لاسه ورکړی او ۲۸۹ نور ټپيان شوي دي.

تېره اونۍ «برېکس» د خپلواک، سوله‌ییز او له ترهګرۍ، جګړې او نشه‌يي توکو د خوندي افغانستان ملاتړ وکړ، م.م په افغانستان کې د ښځو له حقونو د ملاتړ پر پراختیا ټینګار وکړ، غور کې د داعش د دوو کسانو د وژلو خبر ورکړل شو او اروپايي ټولنې د افغانستان د روغتيا له سکټور سره د مرستې لپاره ۳۱ میلیونه یورو ځانګړي کړل.

د غزې روغتيايي چارواکي وايي چې په تېرو ۲۴ ساعتونو کې د اسرائیلو بریدونو کې د ښځو او ماشومانو په ګډون ۷۴ فلسطینیانو ژوند له لاسه ورکړی او ۱۳۰ نور ټپيان شوي دي.

د افغانستان د ارشاد، حج او اوقافو سرپرست وزیر کابل کې د ازبکستان هېواد له علماوو سره په لیدنه کې ویلي، د یاد هېواد د علماوو او چارواکو راتګ له افغانستان سره د ښه ګاونډیتوب، ګډو متقابلو ګټو د تعامل او همکاریو ښکارندویي کوي.

د اطلاعاتو او فرهنګ وزارت وایي، له کتاب‌پلورنځیو له اسلامي او افغاني ارزښتونو سره په ټکر کې شاوخوا ۴۰۰ عنوانه کتابونه راټول شوي او د دې په بدل کې به کتاب‌پلورونکو او خپرندويو ټولنو ته قرانکريم، تفاسير او نور کتابونه ورکړل شي.

د افغانستان د صنعت او سوداګرۍ وزارت وايي چې افغان – قزاق نړۍوال نندارتون پرون د قزاقستان په الماتا ښار کې پرانیستل شو.

نړۍوالو رسنيو راپور ورکړی چې ترکي سیاستوال فتح‌الله ګولن د امریکا د پېنسلوانیا ایالت په روغتون کې د زړه حملې له امله مړی شوی دی.

د راپورونو له مخې، تېره شپه د غزې په شمال کې د بې‌‍ځایه شوو فلسطینیانو پر کورونو د اسرائیلو په هوایي بریدونو کې د ښځو او ماشومانو په ګډون ۷۳ فلسطینیانو ژوند له لاسه ورکړی دی.

تېره اونۍ د شانګهای سازمان سرمشریزې د خبرو له لارې د هېوادونو ترمنځ د شخړو پر هواري ټینګار وکړ، المان له افغانستان سره ۱۱،۲میلیون ډالره مرسته وکړه او په ایران کې د لسګونو افغان کډوالو د وژلو په اړه راپورونه خپاره شول، خو ایران رد کړل او ا.ا یې څېړنې ته پلاوی وټاکه. 

د افغانستان د صنعت او سوداګرۍ وزارت وايي، د دغه وزارت سرپرست د حکومتي او خصوصي سکټور یوه ګډ پلاوي په مشرۍ د افغان – قزاق په نړۍوال نندارتون او سوداګریز تواصل کنفرانس کې د ګډون او ​​د قزاقستان له چارواکو سره د‎ خبرو اترو لپاره د دغه هېواد الماتا ښار ته ولاړ.

د بنګله‌دېش نړۍوالې جنايي محکمې د دغه هېواد د مخکېنۍ ‎لومړۍ وزیرې شیخ‌ حسینې چې دا مهال په هند کې ده، د نیولو حکم صادر کړ.

د پاکستان په کراچۍ کې د افغانستان قونسلګري وايي، په دغه ښار کې د پاکستاني پولیسو له بنده د ماشومانو په ګډون ۱۵ افغان کډوال خوشي شول.