نورالله ځاځى

د ریاست‌الوزراء سیاسي مرستیال ا.ا د افغان قومونو ګډ ټغر یاد کړی او ویلي يې دي، د اسلامي نظام کورنی او بهرنی سیاست د اسلام تر سیوري لاندې پر ملي ګټو راڅرخي او د پلي کېدو لپاره یې د ولس نظر او سلا مشورو ته اړتیا لري.

د افغانستان د احصايې او معلوماتو ملي اداره وایي چې د تېرې میاشتې په اوږدو کې یې د هوايي ډګرونو او بندرونو له لارې هېواد ته د دوه زره او ۵۹۵ بهرنیو وګړو تګ راتګ ثبت کړی دی.

د ټولګټو وزارت وايي، دوو میاشتو کې د هېواد اوسپنې پټلۍ له لارې ۶۰۹ زره او ۱۵۸ مټریک ټنه انتقالات شوي دي.

د ریاست‌الوزراء اقتصادي معاونیت وایي، د ملي تدارکاتو کمېسیون له لوري د شاوخوا څلور میلیارد افغانیو په ارزښت، د کابل – کندهار لویې لار د پاتې چارو بشپړولو په ګډون ۱۴ بېلابېلې پروژې منظور شوې.

د افغانستان د کورنیو چارو وزارت مرستیال له خپل پاکستاني سیال سره لیدنه کې ویلي، افغانستان لکه څنګه چې د ځان لپاره امن غواړي، نورو ته هم ښې هیلې لري او ټول باید د خپلو سیمو امنیتي مسوولیت پر غاړه ولري او د مسایلو د انحراف پر ځای واقعي همکاریو ته زمینه مساعده کړي.

د اوبو او برېښنا وزارت وايي چې لغمان کې د ابو رسولو یوې شبکې جوړېدو ترڅنګ میدان‌وردګو کې د اوبو یوه بند جوړولو چارې پیل او سمنګان کې د یوه چک‌ډیم چارې بشپړې شوې.

د ریاست‌الوزراء سیاسي مرستیال وايي، زندان او توقیف‌خونې باید د شکنجې او ربړولو مرکزونه نه، بلکې د اصلاح او پوهې مرکزونه وي او هر زنداني چې له بنده خلاصېږي، باید د ټولنې د اصلاح او فلاح لپاره کار وکړي.

د پانګونې بین‌الوزارتي کمېټې نوبتي غونډه کې د جلال‌اباد ښار په وچ ډنډ ساحه کې د ښاروالۍ پر ځمکه د اووه پوړیز سوداګریز مارکېټ جوړولو طرحه تایید او د منظورۍ لپاره اقتصادي کمېسیون ته واستول شوه.

افغانستان کرکټ بورډ وایي، د ویسټ‌انډیز لوبډلې پخوانی لوبغاړی ډوین براوو د ۲۰۲۴ کال شل‌اووریز نړۍوال جام لپاره د افغان ملي لوبډلې توپ‌اچونې برخې سلاکار روزونکی ټاکل شوی دی.

د چاپېریال ساتني ملي ادارې رییس د م.م پراختیایي پروګرام له مسوول سره په لیدنه کې ټینګار وکړ چې چاپېریالي مسایل باید سیاسي نه شي او له اقلیمي بدلون سره د مبارزې برخه کې د افغانستان ځنډول شوې پروژې دې ژر تر ژره پیل شي.

د بهرنیو چارو وزارت سرپرست وايي، افغانستان چې څومره د اقلیم بدلون له اړخه متضرر شوی، په هماغه کچه مرستې ته اړتیا لري، باید په نړۍوالو اقلیمي غونډو کې یې دریځ واورېدل شي او د اقليمي بدلون اړوند مالي صندوقونو ته لاسرسی ولري.

د افغانستان د کانونو او پټرولیم وزارت د هرات د باریټو او د کابل د جګدلک یاقوتو کانونو د اکتشاف، استخراج او پروسس تړونونه د څه باندې ۳۳ میلیون ډالرو په ارزښت له دوو داخلي شرکتونو سره لاسلیک کړل.