کابل (پژواک، ۱۰ زمری ۱۴۰۰): په هرات کې د یوناما پر دفتر له برید وروسته د ملګرو ملتونو د یوناما پلاوي په قطر کې له طالبانو سره د خپلو دفترونو پر خوندیتوب خبرې کړې دي.
دوه ورځې مخکې د هرات ښار په بېلابېلو ساحو کې د نښتو پر مهال وسله والو طالبانو د یوناما پر دفتر راکټي برید وکړ چې له امله یې یو ساتونکی ووژل شو او دوه نور ټپیان شول.
ملګرو ملتونو دغه برید وغانده او هغه یې جنګي جرم وباله.
بلخوا د طالبانو د قطر دفتر ویاند ډاکتر نعیم وایي چې له ملګرو ملتونو او نړیوالو موسساتو سره د دوی د سیاسي دفتر د تماس کمېټې مشر ملا عبدالحق وثیق د یوناما له مرستیال سټیف سره ولیدل.
سرچینې زیاته کړې چې په دې لیدنه کې د هرات په ګذرې ولسوالۍ کې د یوناما پر دفتر د وروستۍ پېښې په اړه بحث وشو.
په خبرپاڼه کې راغلي، طالبانو یو ځل بیا خپله پالیسي تکرار کړه چې تر خپلې ولکې لاندې سیمو کې به د ملګرو ملتونو، ټولو موسساتو او عامه تاسیساتو امنيت تامينوي.
ډاکتر نعیم ویلي، د جګړې پر مهال د یوناما دفتر ته زيان رسېدل د دواړو لورو له خوا د تاسف وړ وبلل شو او پر دې ټینګار وشو چې له ورته پېښو باید سیاسي استفادې ونه شي.
د یوناما استازي ویلي چې له دې وروسته به دوی د خپلو دفترونو نقشه او معلومات له طالبانو سره شریکوي، څو د امنيت لپاره يې اقدامات وشي.
Views: 69
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن