ښرنه (پژواک، ٢٧ چنګاښ ١۴٠١): حکومتي مسوولين وايي، د پکتیکا په ګیان ولسوالۍ کې د وروستۍ زلزلې له امله لس کسان ټپیان شوي دي.
د راپورونو له مخې، نن شاخوا پنځه بجې په پکتيکا، خوست او ننګرهار ولايتونو کې زلزله شوې ده.
د پکتيکا د عامې روغتیا ریاست مرستیال ډاکټر محمدیعقوب پتمل پژواک خبري اژانس ته وويل چې د لومړنیو معلوماتو له مخې په ګیان ولسوالۍ کې د وروستۍ زلزلې له امله ۷ کسان ټپيان شوي چې روغتيايي مرکزونو ته انتقال شوي دي.
نوموړی زیاتوي چې په دې زلزله کې ځیني هغه کورونه هم نړېدلي چې د تېرو ورځو په زلزلو کې زيانمن شوي وو.
خو د اطلاعاتو او کلتور ریاست رئیس محمد امین حذیفه په ګیان ولسوالي کې د وروستۍ زلزلې له امله د ټپيانو شمېر ۱۰ تنه ښیي.
د چارواکو په خبره، د زلزلې په وروستۍ پېښه کې څوک مړه شوي نه دي.
د يادونې ده، شاوخوا يوه مياشت وړاندې هم د پکتيکا په ګيان او برمل ولسواليو کې زلزله شوې وه چې له امله يې شاوخوا ٢٥٠٠ کسانو ته مرګژوبله اوښتې وه او سلګونه کورونه نړېدلي وو.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن