[restrict paid=”true”]
اټلانټا (پژواک، ۷ غبرګولی ۱۴۰۲): د پاکستان پخواني لومړي وزیر عمران خان د محکمې له خوا د مجرم پېژندو په صورت کې د خپل ګوند تحریک انصاف مشرۍ لپاره خپل ځایناستی ټاکلی دی.
څو ورځې مخکې د پولیسو له خوا د عمران خان له نیول کېدو وروسته د هغه پلویانو پر ملکي او نظامي ودانیو بریدونه وکړل او پر مهال یي لسګونو کسانو ته مرګژوبله واوښته.
له یادو پېښو وروسته پر عمران خان او د هغه د ګوند پر ګڼ شمېر مشرانو او پلویانو د بغاوت دوسیې جوړې شوې او ګڼ شمېر یې نیول شوي هم دي.
دغه راز عمران د فساد ترڅنګ په ګڼ شمېر نورو قضیو کې هم محکمو ته مطلوب دی، داسې ویل کیږي چې د محکمې له خوا به هغه مجرم وپېژندل شي.
بلخوا عمران تېره شپه اعلان کړی چې د ده د مجرم پېژندل کېدو په صورت کې به د ګوند مشري د هغه مرستیال شاهمحمود قریشي پر غاړه ولري.
قریشي هم له یادو پېښو وروسته د پولیسو له خوا نیول شوی او په زندان کې شپې او ورځې تېروې، خو محکمې تېره ورځ د هغه د خوشي کولو امر کړی دی.
دا په داسې حال کې ده چې د عمران خان په مشرۍ د تحریک انصاف ګوند دوو مرستیالانو او لسګونه مرکزي غړو د ګوند له غړیتوب او سیاسته استعفا کړې ده.
[/restrict]
Views: 1163
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن