جلالاباد (پژواک، ۵ وږی ۱۴۰۲): د افغانستان او ازبکستان د ترانسپورټ وزيرانو تورخم ته د سفر پر مهال له دې لارې پاکستان، هند او نورو اسيايي هېوادونو ته د ازبکستان د صادراتو او وارداتو پيلولو خبر ورکړ.
ملا حميدالله اخندزاده او الهام محکموف نن (یکشنبه) د ننګرهار د مومندرې ولسوالۍ اړوند تورخم ښارګوټي ته سفر وکړ.
د ننګرهار د اطلاعاتو او کلتور له رياسته د وږي په ۵مه پژواک خبري اژانس ته په رالېږل شوې خبرپاڼه کې راغلي چې د دغه سفر پر مهال د ننګرهار مرستيال والي سعيداحمد بنوري او د ازبکستان د ولسمشر ځانګړي استازي عصمتالله ايرګاشف هم برخه اخيستې وه.
سرچينه زياتوي، د يادې ليدنې پر مهال د هېواد د ترانسپورټ او هوايي چلند وزير ملا حميدالله اخندزاده وويل، ازبکستان غواړي د تورخم له لارې د مرکزي او جنوبي اسيا هېوادونو ته صادرات او واردات وکړي چې په دې سره به تورخم کې شاوخوا لس زره کسانو ته د کاروبار زمينه برابره شي.
د ازبکستان د ترانسپورټ وزير الهام محکموف د تورخم ښارګوټي له بېلابېلو برخو ليدنه وکړه او خوښي يې وښوده چې له دې لارې به د اسيا مرکزي او جنوبي هېوادونو ته د بېلابېل ډول توکو صادرات او واردات پيل کړي.
نوموړي وويل، دوی به هره ورځ په منځني ډول په دې لار د اووه سوه زره ټنه مالونو لېږد رالېږد پيل کړي چې د دواړو هېوادونو سوداګرۍ ودې ترڅنګ به زرګونو کسانو ته په مستقيم او غيرمستقيم ډول د کار زمينه برابره شي.
د ننګرهار مرستيال والي مولوي سعيداحمد بنوري وویل، ازبکستان به پر افغانستان سربېره د سوېلي اسيا له هېوادونو سره راکړه ورکړه پيل کړي چې د افغانستان اقتصاد به وده ورسره وکړي او په کور دننه به کاري بوختياوې هم رامنځته شي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن