مولوي عبدالکبیر: د کډوالو وزارت کارکوونکي دې د منفکۍ یا تبدیلۍ په اړه اندېښنه نه کوي

کابل (پژواک، ۳۰ مرغومی ۱۴۰۳): د کډوالو چارو وزارت نوی سرپرست وزیر وايي چې د دغه وزارت ټول مسوولین او کارکوونکي دې خپلو کارونو ته د تېر په څېر دوام ورکړي، د منفکۍ یا تبدیلۍ په اړه دې اندېښنه نه کوي.

د کډوالو او راستنېدونکو چارو وزارت نن پر خپله اېکس‌پاڼه لیکلي چې د یاد وزارت نوي سرپرست مولوي عبدالکبیر یادې څرګندونې په دغه وزارت کې د همغږۍ جوړه شوې ناسته کې وکړې.

سرچینې زیاته کړې، په دې ناسته کې د کډوالو چارو وزارت د فعالیتونو، پلانونو او ستونزو په هکله خبرې وشوې او اړوند مسوولینو د خپلو چارو په اړه وزیر ته معلومات ورکړل.

سرچینه زیاتوي، د کډوالو چارو وزارت سرپرست د ستونزو او ننګونو د حل په اړه ډاډ څرګند کړ او ګډونوالو ته یې په کارونو کې د اخلاص، امانت او چټکتیا سپارښتنه وکړه.

مولوي عبدالکبیر په خپلو خبرو کې وویل: «موږ له عالیقدر امیرالمؤمنین حفظه الله سره بیعت په کومه ځانګړې دنده نه دی کړی، بلکې په اسلام او شریعت مو ورسره کړی او د اسلامي نظام تر سیوري لاندې پر اطاعت مکلف یو.»

هغه څرګنده کړه چې د کډوالو چارو وزارت ټول مسوولین او کارکوونکي دې خپلو کارونو ته د تېر په څېر دوام ورکړي او د منفکۍ یا تبدیلۍ په اړه دې  اندېښنه نه کوي.

د سرچینې د معلوماتو له مخې، په ناسته کې د وزارت مرستیالانو او رییسانو په خپل وار د کډوالو چارو وزارت ته د مولوي عبدالکبیر ورتګ یو ښه زېری وباله او هغه ته یې د اطاعت، همکارۍ او ژمنتیا برخو کې ډاډ ورکړ.

د یادونې ده، څو ورځې مخکې د اسلامي امارت د مشرتابه د حکم له مخې، د ریاست‌الوزراء مخکنی سیاسي مرستیال مولوي عبدالکبیر د کډوالو وزارت سرپرست په توګه وټاکل شو او تېره ورځ یې په رسمي ډول دنده پیل کړه.