<p style="text-align: justify;">شبرغان (پژواک، ۲۲ چنګاښ ۱۴۰۴): جوزجان کې د نسايي ولادي برخې یو متخصصه ثریا قیومي په دغه ولایت کې له ایرانه تازه راستنو شوو مېرمنو ته په وړیا ډول روغتیايي خدمات وړاندې کوي.</p>
<p style="text-align: justify;">دغه اقدام د یادې ډاکټرې له لوري په داسې حال کې اخیستل کېږي چې هره ورځ زرګونه افغان کډوال له ایران، پاکستان او ترکیې راایستل کېږي او هېواد ته راځي. د روغتیايي خدمتونو وړاندې کول په داسې وضعیت کې د هغوی له اساسي اړتیاوو شمېرل کېږي.</p>
<p style="text-align: justify;">جوزجان کې یوه ډاکټره ثریا قیومي چې د نسايي ولادي برخه کې ۲۵ کلنه کاري تجربه لري وايي، هره ورځ له دوو بجو بیا د مازدیګر تر شپږو تازه راستنې شوې بېوزلې ښځې او نجونې په وړیا ډول معاینه کوي او د اړتیا په صورت کې لازم عملیاتونه هم وړیا ترسره کوي.</p>
<p style="text-align: justify;">نوموړې دغهراز زیاته کړه چې د روغتیايي خدمتونو وړاندې کولو ترڅنګ ناروغانو ته د اړتیا وړ درمل هم ورکوي څو ښه درملنه یې وشي.</p>
<p style="text-align: justify;">هغې چې راستنه شوې یوه مېرمن یې معاینه کوله وویل: «زه دې دندې ته یوازې د یوه روغتیايي کار په سترګه نه ګورم، بلکې انساني تعهد یې بولم، موخه مې دا ده چې د مسلک له لارې مې د هغو کسانو بار سپک کړم چې په سختو اقتصادي شرایطو کې دي.»</p>
<p style="text-align: justify;">ډاکټر قیومي چې ویل یې، دا لومړنۍ اقدام نه دی چې د دې له لوري ترسره کېږي، زیاته کړه، تېر کال یې هم ۱۵۰ ناروغانو ته وړیا روغتیايي خدمتونه وړاندې کړي وو.</p>
<p style="text-align: justify;">ځینو راستنو شوو مېرمنو د قیومي د یاد اقدامه ستاینه وکړه.</p>
<p style="text-align: justify;">له ایرانه راستنه شوې یوه مېرمن اناهیتا وايي: «شپږ کاله مې په ایران کې ژوند وکړ، له راستنېدو وروسته له ډېرو روغتیايي ستونزو سره مخ شوم؛ د وینې له کموالي او ښځینه دردونو ځورېدم، خو اوس خوشاله یم چې ډاکټر صاحبې په وړیا ډول معاینه کړم او درمل یې راکړل، ډېره ترې منندویه یم.»</p>
<p style="text-align: justify;">هغه وايي، په ایران کې هم ناروغه وه، خو د اقتصادي ستونزو له امله یې د درملنې وس نه درلود.</p>
<p style="text-align: justify;">ورته مهال، یوې بلې راستنې شوې مېرمنې کریمې وویل، کلونه کېږي چې له نسايي ستونزو سره مخ ده، خو د اقتصادي ستونزو له امله یې نه شو کولای ډاکټر ته مراجعه وکړي.</p>
<p style="text-align: justify;">نوموړې د ثریا یاد اقدام ارزښتمن او انساندوستانه وباله او وايي چې باید نور ډاکټران هم دې ته ورته اقدام ترسره کړي.</p>
