هرات( پژواک،٩ ليندۍ ٩٢):د لوېديځ څلورو ولايتونو د خلکو له خوا په هرات کې د ټاکنو د ملاتړ او شفافيت په اړه ټولنه جوړه شوه.
د هرات پخواني والي ډاکټر داود شاه صبا د ټولنې د رييسه پلاوي غړي وويل، د دې ټولنې په غړيتوب کې، ديني علما،د مدني ټولنو استازي، د ملي او ولايتي شورا غړي ګډون لري، چې موخه يې د عامو او رڼو ټاکنو تر سره کول دي.
هغه زياته کړه، په دې ټولنه کې به د هرات تر څنګ د فراه، غور او بادغيس خلک هم غړيتوب ولري.
په ولسي جرګه کې د هرات د خلکو استازې ناهيد فريد د دې ټولنې جوړښت د وخت اړتيا وبلله او زياته يې کړه، خلک به وهڅوي ، چې د ولسمشرۍ او ولايتي شوراګانو وړ کانديدانو ته رايه ورکړي.
نوموړې زياته کړه، په تېرو دورو کې د خلکو په رايو معاملې شوې وې ، خو دا ځل به خلک په رڼو ټاکنو کې د خپلې خوښې او وړ کانديد ته رايه ورکوي.
د مدني ټولنې فعال او په هرات کې د افغان ملت ګوند د سيمه ييز دفتر مشر محمد معروف فضلي بيا وايي، چې دا ډول حرکتونه نمايشي دي ، خو سره له هغه هم اغېز لري.
د نوموړي په وينا،د دې ډول حرکتونو فعاليت بايد تر رسنيو محدود پاتې نه شي، بلکې په اغېزمنه توګه کار وکړي او خلکو ته عامه پوهاوى ورکړي.
د دې ټولنې غړيو په يوه غږ د افغانستان او امريکا تر منځ د امنيتي او دفاعي تړون د لاسليک ملاتړ وکړ او دا يې د افغانستان په ګټه وباله، چې له لويو ځواکونو سره ستراتيژيک او امنيتي تړونونه ولري.
د يوبل خبر له مخې، نن دکابل په ښار کې د سلګونو ځوانانو په ګډون د( خط نو) ټولنې له ځوانانو وغوښتل ، چې په راتلونکو ټاکنو کې فعال حضور او اغېز ثابت کړي.
د ټولنې مشر فهيم صديقي يادونه وکړه، چې په ټاکنو کې د ځوانانو انګيزه کمزورې ده او بايد په کې فعاله ونډه واخلي.
د ولسي جرګې غړي بکتاش سياووش په دې غونډه کې وويل، چې ځوانانو ته د حکومت پاملرنه کمه شوې او بايد تر بل هر وخت ورته د تحصيل زمينه برابره کړي ، تر څو په راتلونکي کې بهرنيو سالاکارانوته اړتيا پيدا نه شي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن