کابل، فيض اباد (پژواک ١٧ چنګاښ ٩٣): د ملي امنيت عمومي رياست وايي، چې په بدخشان کې د ١٤ وژل شويو وسله والو مخالفينو په ډله کې، د دوى له لوري نومول شوى والي هم شامل دى.
د دغه رياست د مطبوعاتي دفتر له لوري په خپره شوې خبرپاڼه کې ويل شوي، چې دغه ډله وسله وال مخالفين د جرم ولسوالۍ په راغک سيمه کې، د امنيتي ځواکونو د ځانګړو عملياتو په ترڅ کې وژل شوي دي.
سرچينې زياته کړې، چې په وژل شويو کسانو کې د قاري فصيح الدين په نامه د طالبانو له لوري نومول شوى والي، يو پاکستانى او تاجکستانى وګړي هم شامل دي.
دا په داسې حال کې ده، چې له دې وړاندې د بدخشان د والي وياند احمد نويد فروتن پژواک خبري اژانس ته ويلي و، چې په جرم ولسوالۍ کې د دوه بهرنيانو په ګډون ١٤ وسله وال مخالفين وژل شوي او دولس نور ټپيان شوي دي.
خو نوموړي، فصيح الدين د طالبانو قوماندان بللى و او د دوه بهرنيانو هويت يې هم نه و څرګند کړى.
د طالبانو وياند ذبيح الله مجاهد، د خپلو کسانو د مرګ ژوبلې په اړه څه نه دي ويلي، خو وايي چې په جرم ولسوالۍ کې سخته جګړه روانه ده، چې په اړه به يې جزيات په راتلونکي کې خپاره شي.
د ويلو ده، چې تېره اونۍ د جرم ولسوالۍ په دهن خستک سره په نږدې سيمه کې، څلور وسله وال مخالفين، دوه ملکيان او د ملي اردو يو سرتېرى هم وژل شوي دي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن