لښکرګاه (پژواک، ٢٢ لړم ٩٥): د هلمند والي، څلور پوليس له موټرچلوونکو د پیسو اخيستو پر مهال لاس په لاس نيولي او عدلي او قضايي ارګانونو ته يې معرفي کړي دي.
دغه څرګندونې په هغې خبرپاڼه کې شوې چې د هلمند د والي له مطبوعاتي دفتره د لړم په ٢٢مه پژواک خبري اژانس ته رالېږل شوې ده.
په خبرپاڼه کې راغلي چې د هلمند والي حيات الله حيات د خلکو د شکايتونو پر بنسټ د يو شمېر لويو لارو له پوستو څخه ليدنه وکړه.
سرچينه زياتوي چې په دې لويو لارو کې والي په خپله له موټر چلوونکو او خلکو د امنيتي ځواکونو د چلند په اړه پوښتنې وکړې.
د سرچينې په حواله، والي د لارې په اوږدو کې څلور هغه پوليس هم ونيول چې له موټر چلوونکو څخه يې پيسې اخيستې.
خبرپاڼه کې راغلي: ((دغه پوليس عدلي او قضايي ارګانونو ته معرفي شول او يو شمېر نورو پوليسو چې له خلکو سره يې سم چلند کاوه هغوى د والي له لوري مکافات شول.))
د والي د يادې کړنې په اړه د هلمند مدنې ټولنې مشر سردارمحمد همدرد پژواک ته وويل چې دغه ډول کړنې د دولت او خلکو تر منځ واټن له منځه وړي.
هغه زياته کړه: ((دا يو ښه ګام دى موږ يې ستاينه کوو.))
دغه راز د هلمند والي خلکو ته ډاډ ورکړ چې شته ستونزې به حل شي او خبرداری یې ورکړ چې د پولیسو له خوا د یادو ناقانونیو د دوام په ترڅ کې به د پوستو قوماندانان او مسوولین هم مجازات کړي.
هلمند د افغانستان تر ټولو نا امن ولايت دى چې دا مهال يې په مرکز لښکرګاه ښار کې هم دوامداره جګړې روانې دي.
غړيYou need to subscribe to view the full article. Please login or register a new account.
