زابل کې هوايي بريد لسګونو کورنيو او بهرنيو وسله والو ته مرګ ژوبله اړولې

کلات (پژواک، ٥ سلواغه ٩٥): چارواکي وايي چې په زابل ولايت کې د هوايي بريد له امله د القاعدې او طالبانو لسګونو کورنيو او بهرنيو وسله والو ته مرګ ژوبله اوښتې ده.

د زابل د والي وياند ګل اسلام سيال د سلواغې په ٥ مه، پژواک خبري اژانس ته وويل چې دا هوايي بريد د بهرنيو ځواکونو لخوا تېره شپه د خاک افغان ولسوالۍ په مربوطاتو کې شوى دى.

هغه زياته کړه چې په ياده ولسوالۍ کې د شفق ٢ عملياتو پر مهال کشفي ارګانونو د القاعدې او طالبانو د کورنيو او بهرنيو وسله والو د شتون په اړه معلومات له بهرنيو ځواکونو سره شريک کړي وو.

د والي وياند وايي چې په دې هوايي بريد کې ٣١ وسله وال وژل شوي او ١٩ نور يې ټپيان شوي دي، چې يو شمېر قوماندانان هم په کې شامل دي.

د سيال په وينا، په دې عملياتو کې ملکي وګړو ته زيان نه دى اوښتى.

دوه ورځې مخکې هم ځايي چارواکو په دغه ولايت کې د داعش د ٢١ وسله والو د وژلو خبر ورکړى و.

د يادونې ده چې په دې وروستيو کې د زابل په خاک افغان، ارغنداب او ځينو نورو ولسواليو کې د طالبانو، داعش او القاعدې ترڅنګ د ځينو نورو بهرنيو ډلو وسله وال هم مېشت شوي دي.

يادو ډلو تراوسه په دې اړه څه نه دي ويلي.