مزارشريف (پژواک، ۳۰ وری، ۹۶): د ملي د دفاع وزير جنرال عبدالله حبيبي وايي چې د دښمن ملا ماته شوې او د هغو تر له منځه وړلو پورې به ورسره جګړه وکړي.
نوموړي د شمال زون په ۲۰۹ شاهين قول اردو سرتېرو ته په يوه غونډه کې د خپلو خبرو په ترڅ کې وويل چې ۱۳۹۵لمريز کال د دښمن پر وړاندې د افغان ځواکونو بريالی کال و.
نوموړي زياته کړه چې په تېر کال کې دښمن ډېر شوم پلانونه لرل، خو عملي يې نه شو کړای.
خو د ملي دفاع وزير دا هم وويل چې روان کال به هم د افغان ځواکونو لپاره اسان کال نه وي.
نوموړي زياته کړه، لا هم د دښمن پر وړاندې دمې ته اړتيا نشته او په پرله پسې توګه بايد د هېواد د امنيت ساتنې پر وړاندې په سنګرونو کې تيارسی و اوسو.
د دفاع وزير حبيبي د شاهين قول اردو سرتېرو ته په خطاب کې وويل: ((د تېر کال په ژمي کې د دښمن ملا ماته شوې، اوس به يې نه پرېږدئ، ورپسې ورشئ او نابود يې کړئ.))
نوموړي په دفاع وزارت کې د فساد په تړاو وويل، هېچا ته به اجازه ورنه کړی چې د افغان سرتېري په حق کې فساد وکړي.
نوموړي زياته کړه، د دفاع وزارت رهبري او سرتېري به په ګډه د مفسدينو پر وړاندې کار کوي او د ملي اردو له ليکو څخه به يې باسي.
په شمال زون کې د شاهين قول اردو قوماندان مومند کټوازي وويل، تېر کال يې په شمال زون کې دښمن ته سخته ماتې ورکړې ده.
نوموړي زياته کړه، په ۹۵ لمريز کې د شمال زون په بېلابېلو ولايتونو کې ۱۰۰ چاڼيز عمليات په برياليتوب سره ترسره شوي دي.
د هغه په وينا، په دغه کال کې ۳۶۰ وسله والو مخالفينو وسلې کېښودې او د سولې پروسې له لارې عادي ژوند ته وګرځېدل.
کټوازي وويل، دمګړۍ هم د شمال زون په بېلابېلو ولايتونو کې د دښمن پر وړاندې چاڼيز عمليات روان دي.
نوموړي زياته کړه، په دغو عملياتو کې تر دې دمه ۱۰۸ وسله والو مخالفين وژل شوي او ۱۱۶ ټپیان شوي دي.
د هغه په وينا، سږ کال هم د سولې پروسې له لارې ۱۵۰ وسله وال مخالفين عادي ژوند ته ګرځېدلې دي.
مومند کټوازي ټينګار وکړ چې سږنی کال به هم په شمال زون کې دښمن د ناکامۍ کال وي.
غړيYou need to subscribe to view the full article. Please login or register a new account.
