کابل (پژواک، ٢١ غبرګولى ٩٥): ولسمشر اشرف غني او د پاکستان لومړي وزير هوکړه کړې ده چې د ټولو هغو ترهګرو ډلو پر ضد ګډه مبارزه کوي چې د دواړو هېوادونو او سيمې امنيت ته يې ګواښ رامنځته کړى دى.
د افغانستان د ولسمشرۍ ماڼۍ (ارګ) په ټولنيزه شبکه فېسبوک کې د ولسمشر غني او د پاکستان د لومړي وزير نوازشريف د ليدنې انځورونه او لنډ معلومات خپاره شوي دي.
سرچينې زياته کړې ده چې دا ليدنه دوه ورځې مخکې د قزاقستان په پلازمېنه استانه کې د شانګهاى کنفرانس په څنډه کې وشوه.
د خبرپاڼې د معلوماتو له مخې، ولسمشر پر ملکي وګړو د بريدونو پر نه کولو ټينګار وکړ او په ډاګه يې کړه چې د روژې په مبارکه مياشت او د جنازې په مراسمو بريدونه نور افغانانو ته د منلو وړ نه دي.
سرچينې ويلي، د پاکستان لومړي وزير نوازشريف په افغانستان کې وروستي ترهګريز بريدونه په کلکه وغندل.
په خبرپاڼه کې راغلي، ولسمشر اشرف غني او د پاکستان لومړي وزير موافقه وکړه چې د ټولو هغو ترهګرو ډلو پر ضد به ګډه مبارزه کوي چې د دواړو هېوادونو او سيمې امنيت ته يې ګواښ رامنځته کړى دى.
دغه راز په دې ليدنه کې افغانستان او پاکستان د يوې ګډې کاري ډلې پر جوړولو هم موافقه وکړه چې لومړۍ غونډه به يې په کابل کې جوړېږي.
خو سرچينې د دې غونډې کره نېټه نه ده په ډاګه کړې.
دغه راز د افغانستان ولسمشر اشرف غني د سولې لپاره د پاکستان او افغانستان د ګډو غونډو پر جوړولو هم هوکړه کړې ده.
د يادونې ده، د شانګهاى غونډې پر مهال د چين ولسمشر شي جین پینګ د افغانستان له ولسمشر اشرف غني سره د ليدنې پر مهال د افغانستان، پاکستان او چین تر منځ د درې اړخیزې ناستې د جوړولو وړانديز کړى و.
login or register a new account.
