په نړۍ کې د کرونا ناروغانو شمېر څه کم ۷۵ میلیونو ته ورسېد

کابل (پژواک، ۲۸ لیندۍ ۹۹): د راپورونو له مخې، په ټوله نړۍ کې د کرونا ويروس د ناروغانو شمېر له ۷۴ ميليون کسانو څخه اوښتی، خو تر ۴۲ ميليونه زیات کسان بېرته روغ شوي دي.

د کرونا ويروس چې يو کال مخکې لومړى د چين په اووهان ښار کې پیدا شو، وروسته د نړۍ په شاوخوا ٢١٠ هېوادونو او سیمو کې خپور شو، اوس په ډېرو هېوادونو کې کنټرول شوى، خو په ځينو هېوادونو کې يې دويمه څپه پيل شوې ده.

د امريکا د جان هاپکنز پوهنتون د معلوماتو له مخې چې د کرونا ناروغۍ په اړه معلومات او ارقام خپروي، تر نن سهاره پورې په ټوله نړۍ کې د کرونا ناروغانو شمېر  ۷۴ میلیونه ۸۸۷زره او ۳۹۰ کسانو ته رسېدلی دی.

سرچينې زياته کړې، تراوسه څه باندې ۴۲ ميليونه ناروغان له دې ناروغۍ بېرته روغ شوي او يو ميليون او ۶۶۰زره  او ۲۷۱ کسان یې له امله مړه شوي دي.

د خپرو شويو معلوماتو او ارقامو له مخې، هره ورځ په ټوله نړۍ کې څه باندې ٣٠٠زره کسان پر کرونا اخته او شاوخوا اووه زره کسان یې له امله مړه کېږي.

دغه راز روسيه، کولمبيا، مکسيکو، سوېلي افريقا، هسپانیه، ارجنټاين، چيلي، برېتانیا، ایټالیا، جرمني، ایران، ترکیه او پیرو هغه هېوادونه دي چې د کرونا د ناروغانو او مړو شمېر په کې ډېر دی.

په افغانستان کې تراوسه څه باندې ۵۰زره کسان پر کرونا اخته شوي، ۲۰۳۷ کسان مړه او نږدې ۳۹زره کسان بېرته روغ شوي دي.