د ولسي جرګې د غړې ګلالۍ محمدي ورور په کندهار ښار کې وژل شوی

کندهار (پژواک، ۵ سلواغه ۹۹): په کندهار ښار کې د وسله والو په یوه هدفي برید کې د یوې امنیتي پوستې قوماندان وژل شوی دی.
نوموړی په ولسي جرګه کې د کندهار د خلکو د استازې ګلالۍ محمدي ورور هم دی.
پېښه یو ساعت مخکې د ۱۲مې امنیتي حوزې اړوند سیمانو پول ته نږدې شوې ده.
یوې امنیتي سرچینې پژواک خبري اژانس ته وویل، وژل شوی تن حاجي محمد نومېږي او په ۱۱مه امنیتي حوزه کې یې د یوې پوستې د قوماندان په توګه دنده ترسره کوله.
دغه سرچینه وايي، بریدګر تښتېدلي خو پولیسو یې لټون پیل کړی دی.
یوې بلې سرچینې پژواک خبري اژانس ته وویل، وژل شوی تن په ولسي جرګه کې د اروزګان د خلکو د استازې ګلالۍ محمدي ورور دی.
په خپله ګلالۍ محمدي هم د خپل ورور وژنه تایید کړې ده.
د دغه برید مسوولیت تر اوسه چا نه دی منلی. د کندهار امنیتي ارګانونه په دې اړه ناخبري ښيي.

Views: 546