<p style="text-align: justify;">کابل (پژواک، ٢۲ سلواغه ٩٩): د باميانو د لومړي يکاولنګ ولسوالۍ ابتدائيه څارنوال د رشوت اخيستو په تور نيول شوى دى.</p>
<p style="text-align: justify;">د لویې څارنوالۍ له خوا خپره شوې خبرپاڼه کې راغلي چې د کنټرول او مراقبت څارنوالۍ ریاست د ملي امنیت منسوبینو او د بامیان امنیې قوماندانۍ په مرسته د اوپراتیفي عملیاتو په پایله کې د بامیان د لومړي یکاولنګ ولسوالۍ ابتدائیه څارنوال د ۱۳۹۹ لمریز کال د سلواغې په ۲۱مه له ۱۰۰زره افغانیو رشوت څخه د ۳۰زره افغانیو اخیستو په تور لاس په لاس ونیو.</p>
<p style="text-align: justify;">سرچينې زياته کړې، د دې قضيې د څېړنې او اجرااتو پایلې به د تحقیقاتي او محاکماتي پړاوونو له بشپړېدو وروسته شریکې شي.</p>
<p style="text-align: justify;">په خبرپاڼه کې راغلي، دا قضیه د افغانستان اسلامي جمهوري دولت لوی څارنوال د دوشنبې لیدنو په ترڅ کې چې د بامیان د یوه اوسېدونکي له خوا له لوی څارنوال سره نېغ په نېغه شریکه شوې وه، ثبت او په تړاو یې اجراات وشول.</p>
<p style="text-align: justify;">لويې څارنوالۍ ويلي، دغه هېوادوال د یکاولنګ ولسوالۍ ابتدائیه څارنوال له خوا د نوموړي د نسبتي دوسیې په تړاو د کارونو د ځنډ او د رشوت له غوښتلو شکايت کړى و.</p>
<p style="text-align: justify;">په خبرپاڼه کې راغلي، له هېوادوالو سره د لوی څارنوال د دوشنبې لیدنې هره اوونۍ د هغوی ستونزو او قضیو ته د رسېدنې په موخه کېږي چې دا کار له یوې خوا عدالت ته د خلکو په لاسرسي کې ګټور دی او له بلې خوا د څارنوالانو او د دې ادارې د کارکوونکو پر اجرااتو نظارت او څار پياوړی کوي.</p>
<p style="text-align: justify;">سرچينې زياته کړې، لویه څارنوالي له دې ادارې سره د قانون د تطبیق او عدالت د تأمین په برخه کې د هېوادوالو پر همکارۍ او ملاتړ ټینګار کوي او همداراز داخلي نظارت، روڼتیا او له اداري فساد سره مبارزه خپل کاري لومړیتوب ګڼي او هغه کسان چې پر فساد ککړ وي، نیسي او تر عدلي تعقیب لاندې یې راولي.</p>
