شبرغان(پژواک، ۱۲ زمری۱۴۰۰): د جوزجان د ولایتي شورا یوه غړی شبرغان ښار کې د جګړو شدت د اندېښنې وړ بولي او مرکزي ادارې ته یې په ډاګه کړه چې که دغه ولایت ته تازه دمي ځواکونه ونه رسېږي د شبرغان ښار د سقوط احتمال موجود دی.
د یادونې ده چې شبرغان ښار له تېرو دوو اوونیو راهیسې د طالبانو له خوا کلابند دی او یاده ډله هره ورځ پر ښار بریدونه کوي.
د جوزجان د ولایتي شورا غړي مولوي عبدالحي حیات نن په داسې حال کې په ناسته کې خبریالانو ته د امنیتي وضعیت د خرابېدو په اړه خبرې وکړې چې د دغه ښار په شاوخوا کې د ډزو اوازونه اورېدل کېږي.
هغه وویل: ((دوه نیمې اوونۍ کېږي چې طالبانو شبرغان ښار کلابند کړی او جګړه د ښار تر درې کیلومترۍ پورې رسېدلې، خو حکومتي چارواکو دغه ولایت ته د کومانډو او تقویتي سرتېرو لېږلو ته هیڅ توجه نه لري.))
هغه زیاته کړه: ((د هېواد صالحه چارواکي تل جوزجان ولایت شپږمه ګوته ګڼي او د دغه ولایت د خلکو حالت ته شاید او باید توجه نه لري، موږ دلته د ملي اردو لوا لرو خو له تشکیل څخه یې خبر نه یو، دغه لوا یوازې د یوه کنډک په کچه فعالیت لري چې د مخالفینو د بریدونو د مهارولو لپاره کافي نه ده.))
نوموړي وویل، که حکومتي چارواکي دغه ولایت ته توجه ونه کړي ډېر احتمال شته چې شبرغان ښار ژر د طالبانو له خوا سقوط شي.
حیات زیاته کړه: ((تر اوسه یوازې د ملي اردو کنډک، امنیې قوماندانۍ، ملي امنیت محدود ځواکونه د رجال برجسته قطعې له ځواکونو سره په همغږۍ د طالبانو پر وړاندې جګړه کوي.))
دا په داسې حال کې ده چې د طالبانو ویاند ذبېح الله مجاهد په یوه لنډ پیغام کې ویلي چې تېره شپه یې د شبرغان ښار صوفي کلا او خاتون کلا کلي نیولي دي.
هغه ویلي چې د تېرې شپې په جګړه کې ۹ امنیتي منسوبین وژل شوي او ۱۵ نور ټپیان دي.
مجاهد ویلي چې په دې جګړه کې یو طالب وژل شوی او دوه نور ټپیان دي، دغه راز د دولتي ځواکونو یوه رینجر او یوه اندازه مهمات هم طالبانو په غنیمت نیولي دي.
خو د جوزجان ولایت امینه قوماندان مل پاسوال خواجه جیلاني ابوبکر د طالبانو ادعا رد کړه او ویې ویل، د تېرې شپې په جګړه کې امنیتي ځواکونو ته مرګ ژوبله نه ده اوښتې.
هغه زیاته کړه چې په دې جګړه کې درې طالبان وژل شوي او دوه نور ټپیان دي، اوس مهال امنیتي ځواکونه په دفاعي کرښه کې د طالبانو د بریدونو پر مهارولو بوخت دي.
له دوو اوونیو ډېر وخت کېږي چې طالبانو شبرغان ښار کلابند کړی خو د هېواد صالحه چارواکو د دغه ولایت د اوسېدونکو د ژغورلو لپاره هېڅ اقدام نه دی کړی.
حکومتي چارواکو د ولایتي شورا د یاد غړي د څرګندونو اړوند څه نه دي ویلي.
