والي: د نورستان د وروستيو سيلابونو له امله ١٣١ کسان مړه شوي

پارون (پژواک، ١٤ زمرى ١٤٠٠): د نورستان والي وايي چې د کامدېش ولسوالۍ سيلاب ځپلو ته د خوراکي او غير خوراکي توکو د مرستې وېشلو لړۍ پيل شوې ده.

تېره اوونۍ د نورستان ولايت د کامدېش ولسوالۍ په ميرديش کلي کې سيلابونه راغلي چې د ويجاړۍ ترڅنګ يې لسګونو کسانو ته مرګ ژوبله هم اړولې ده.

د نورستان والي حافظ عبدالقيوم د زمري په ١٤ مه پژواک خبري اژانس ته وويل چې د دغو سيلاب له امله تر اوسه د ١٣١ کسانو جسدونه پيدا شوي او د ځينو نورو مړي تر اوسه ورک دي.

دى وايي چې د همدې سيلابونو له امله يو جامع جومات، ١٧٣ کورونه، ١٢ کيلومتره سړک، ١١ سوه جريبه ځمکه، ١٠ ژرندې، دوه سکواټوره، څلور ډاډسن موټرونه، ١٠ هټۍ، يو لوى پول او شپږ کوچني پلونه له منځه تللي دي.

ده وويل:" له ډېرو هلو ځلو وروسته په دې وتوانېدو چې د کامدېش خلکو ته مرستې ورسوو."

والي مخکې ويلي و چې د نا امنۍ او ځينو نورو ستونزو له امله دوى نه شي کولاى سيلاب ځپلو سره بېړنۍ مرستې ترسره کړي.

حافظ عبدالقيوم زياتوي چې په يادو مرستو کې خېمې، د پخلنځي توکي، کمپلې، غوړي، دال، لوبيا، بوره، مالګه بسکيټونه او ځينې نور اړين توکي او وسايل شامل دي.

ده زياته کړه: "د مرستو لړۍ روانه ده، دغه مرستې زموږ د سرې مياشتې د ټيمونو له خوا وېشل کيږي."

والى وايي چې ولسمشر هم ورسره ټيلېفوني اړيکه کړې وه او د کامدېش ولسوالۍ خلکو ته يې د بېړنيو مرستو رسولو هدايت کړى دى.

ده وويل، ولسمشر د کامدېش ولسوالۍ سيلاب ځپلو ته د مرستو رسولو په موخه د هر ډول همکارۍ ډاډ هم ورکړى دى.

دا په داسې حال کې ده چې يو شمېر نورو سرچينو پژواک ته ويلي چې د ياد سيلاب له امله د ورانيو او تلفاتو کچه څو برابره نوره هم لوړه ده.