د کندهار ښار یوه مدرسه کې د چت لوېدو له امله یو ماشوم مړ او ۱۳ نور ټپيان شوي

کندهار (پژواک، ۹ مرغومی ۱۴۰۰): د کندهار ښار په یوه دیني مدرسه کې د یوه ټولګي د چت لوېدو له امله یو زده کوونکی مړ او ۱۳ نور ټپيان شوي دي.

پېښه نن غرمه د کندهار ښار د ۶مې ناحیې اړوند د نوي ښار په سیمه کې په النوریه خصوصي دیني مدرسه کې شوې ده.

د کندهار د پوهنې ریاست ویاند نظرمحمد صمیمي پژواک ته پېښه تایید کړه خو ویې ویل چې په دې اړه ډېر نور معلومات نه لري.

هغه زیاته کړه چې پېښه په یوه خصوصي دیني مدرسه کې شوې ده.

د سیمې یوه اوسېدونکي او د پېښې عیني شاهد حمزه پژواک خبري اژانس ته وویل، النوریه دیني مدرسه چې لسګونه ماشومان په کې دیني زده کړې کوي، په یو ډېر زاړه کور کې فعالیت لري.

دی وايي، د خونو چتونه په لرګیو پوښل شوي چې ښايي د لوېدو لامل یې هم همدا وي.

ده هم وویل چې په دې پېښه کې یو زده کوونکی مړ شوی او ۱۳ نور ټپيان شوي چې د درملنې لپاره میرویس روغتون ته لېږدول شوي دي.

د کندهار میرویس حوزوي روغتون سرطبیب ډاکټر محمد قاسم پژواک خبري اژانس ته وویل، د پېښې له ځایه یو جسد او ۱۳ ټپيان ور وړل شوي دي.

هغه زیاته کړه، د ټپیانو درملنه پیل شوې چې ډېری یې مخ په ښه کېدو دي خو د درېیو ټپیانو روغتیايي وضعیت ښه نه دی.

د یادونې ده، تېر کال هم په کندهار ښار کې په یوه دیني مدرسه کې د چت لوېدو په ورته پېښه کې ۵ زده کوونکي مړه او ۸ نور ټپيان شوي وو.