اټلانټا (پژواک، ۱۳ زمری ۱۴۰۱): په مدینه منوره کې مسجد نبوي ته د سپکاوي له امله د سعودي عربستان یوې محکمې شپږو تنو پاکستانیانو ته د بند سزا اورولې ده.
د تېرې روژې میاشتې پر مهال کله چې د پاکستان لومړي وزیر شهبازشریف له یوه پلاوي سره مدینه منوره کې مسجد نبوي ته ولاړ، نو د عمران خان په مشرۍ د هغه سیاسي مخالفینو په مسجد کې دننه د هغه پر ضد نارې ووهلې او پر ځینو غړو یې ګوزارونه هم کړي وو.
د سعودي حکومت د قانون له مخې په حرمینو الشریفینو کې هر ډول سیاسي فعالیت سخت جرم ګڼل کېږي او مرتکبینو ته یې سزا ورکول کېږي.
د پاکستان جیو تلویزیون خبر ورکړی چې د سعودي عربستان یوې محکمې تر څو میاشتو بحثونو وروسته پر شپږو پاکستانیو وګړو یاد جرم ثابت کړ او ورته یې سزا واوروله.
د راپور له مخې، درېیو پاکستانیانو ته د لسو، لسو کلونو، درېیو نورو ته د اتو اتو کلو بند سزا اورول شوې ده.
سرچینې زیاته کړې چې محکمې یاد کسان په ۲۰ ، ۲۰ زره ریالو جرمانې هم محکوم کړي دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن