اټلانټا (پژواک، ۹ تله ۱۴۰۱): د ایران سپاه پاسداران وايي چې په دغه هېواد کې د روانو لاریونونو پر مهال د دوی دوه لوړپوړي افسران وژل شوي دي.
د سپاه پاسدران له خوا په یوه خبرپاڼه کې راغلي چې د استخباراتو یو افسر ډګروال حمید رضا هاشمي له “ترهګرو” سره د جګړې پر مهال ټپي شوی و خو وروسته ساه ورکړه.
دغه راز د ایران د سیستان بلوچستان ایالت په مرکز زاهدان کې د جمعې په ورځ د پولیسو یوې پوستې ته نږدې د ډزو له امله د وژل شوو کسانو شمېر ۲۰ ته لوړ شو.
د ایران دولتي رسنۍ ویلي چې په وژل شوو کې د یاد ولایت د استخباراتو یو افسر ډګروال علي موسوي هم شامل دی.
تسنیم خبري اژانس خبر ورکړی چې د جیش العدل په نوم سني ډلې د زاهدان پولیسو مرکز ته نږدې د برید مسوولیت پر غاړه اخیستی دی.
د راپورونو له مخې، جیش العدل ډله په وروستیو کلونو کې د ایران په سیستان بلوچستان ایالت کې فعالیت پیل کړی چې تر اسوه یې څو سترې بمې چاودنې او برمتې کړې دي.
ایران په داسې حال کې د خپلو دوو افسرانو وژل کېدو خبر ورکوي چې دغه هېواد له بل سرخوږي سره هم مخ دی؛ د سپپټمبر په ۱۶مه نېټه په ایران کې د ۲۲ کلنې مهسا امیني له وژل کیدو وروسته د ایران حکومت د خلکو له پراخ غبرګون سره مخ شوی دی.
په ایران کې خلک د جمعې په ماښام په داسې حال کې د پنځلسمې پرله پسې شپې لپاره لاریونونو ته راووتل چې د بشري حقونو د څار ډلو په وینا، د لاریون د ځپونکو اقداماتو له امله څه باندې ۸۰ کسان وژل شوي دي.
Visits: 109
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن