<p style="text-align: justify;">میمنه (پژواک، ۵ سلواغه ۱۴۰۱): د فاریاب ولایت په مرکز میمنې ښار کې د سړک غاړې لیلامي پلورونکي د خپلو توکو د پلور له بازاره خوښي څرګندوي، وايي چې د تېرو کلونو په پرتله د لیلامي توکو د پېرېدونکو شمېر ډېر شوی دی.</p>
<p style="text-align: justify;">دا په داسې حال کې ده چې د میمنې ښاروالۍ هغوی ته د یوه مشخص ځای برابرولو خبره کوي.</p>
<p style="text-align: justify;">یارمحمد چې د میمنې ښاروالۍ د پارک په شمالي څنډه کې لیلامي توکي پلوري، پژواک ته یې وویل، د تېرو کلونو په پرتله د لیلامي توکو د پېرېدونکو شمېر ډېر شوی دی.</p>
<p style="text-align: justify;">نوموړي زیاته کړه، دا چې سیمهییز حکومت او د میمنې ښاروالۍ د سړک پر سر د پلورونکو لپاره د پارک په شاوخوا کې د کار زمینه برابره کړې او څوک ترې کرایه نه اخلي، خوښ دی.</p>
<p style="text-align: justify;">هغه د لیلامي توکو د پلور له درکه د خپلې ۷ کسیزې کورنۍ نفقه، د خپلو څلورو زامنو د قلم او کتابجو لګښتونه چې په کورسونو کې پر زده کړې بوخت دي، برابروي.</p>
<p style="text-align: justify;">یارمحمد له دې امله چې ښوونځی نه دی لوستی د پښیمانۍ احساس کوي؛ خو خپل زامن یې په کورسونو او ښوونخي کې شامل کړي او هوډ یې کړی چې خپله کار وکړي او زیار و باسي، څو خپل اولادونه د لوستو، صادق او خدمتګار کسانو په توګه ټولنې ته وړاندې کړي.</p>
<img class="aligncenter wp-image-513745 " src="https://pajhwok.com/wp-content/uploads/2023/01/لیلامی-فروشی-در-فاریاب-2-1024x683.jpg" alt="" width="515" height="343" />
<p style="text-align: justify;">د یادې سیمې یو بل لیلامي پلورونکی عبدالحی وایي، په دې ورځو کې د لیلامي توکو د پلور بازار ګرم دی او ډېر مشتریان لري؛ ځکه د هغه په خبره د خلکو اقتصاد کمزوری شو او په لیلامي توکو ګوزاره کوي.</p>
<p style="text-align: justify;">نوموړي خپل ځان د پشتونکوټ ولسوالۍ اوسېدونکی معرفي او زیاته یې کړه، څو کاله کیږي چې د میمنې ښار په یوه کرایي کور کې اوسیږي، د کور ۱۱ کسانو ته نفقه برابروي او د لیلامي توکو د پلور له درکه د ورځې درې تر څلورسوه افغانۍ ترلاسه کوي، پر دې او هغو پیسو سره چې زوی یې له ایرانه ورته را لېږي خپل ژوند تېروي.</p>
<p style="text-align: justify;">ځينې هېوادوال وایي چې د نوي جنس د رانیولو توان نه لري.</p>
<p style="text-align: justify;">د بلچراغ ولسوالۍ یو اوسېدونکی شاه محمد چې میمنې ښار کې د لیلامي توکو پر پېرلو بوخت دی وایي، د کار نهشتون له امله غواړي چې ایران ته لاړ شي، لیلامي جاکټ او جمپر یې وپېره څو په لاره یې په تن کړي.</p>
<p style="text-align: justify;">هغه وویل، یو لیلامي جمپر او یو جاکټ یې په ۲۵۰ افغانۍ اخیستی، کوم توکي یې چې پېرلي، په هټیو کې یې تر ۱۵۰۰ افغانیو کم نه شوای ترلاسه کولای.</p>
<img class="aligncenter wp-image-513743 " src="https://pajhwok.com/wp-content/uploads/2023/01/لیلامی-فروشی-در-فاریاب-1-1024x683.jpg" alt="" width="518" height="346" />
<p style="text-align: justify;">په ورته وخت کې، حمیرا چې له یو شمېر ښځو سره د لیلامي توکو پېرلو ته راغلې وه، له اقتصادي ستونزو شکایت لري او وایي چې د نویو جامو اخیستو وس نه لري او اړه ده چې لیلامي جامي وپېري.</p>
<p style="text-align: justify;">د هغې په وینا، مېړه یې چې په تېر حکومت کې پولیس و او مشر زوی یې په یوه دفتر کې کار کاوه، تر سیاسي تحول وروسته د بېکارۍ له امله ایران ته ولاړل.</p>
<p style="text-align: justify;">خو ځيني هټۍوال د خپل کاروبار له کمرنګه کېدو شکایت لري.</p>
<p style="text-align: justify;">په میمنې ښار کې یوه هټۍوال زینالله وایي، د تېرو کلونو په پرتله یې ۶۰ سلنه پلور کم شوی دی.</p>
<p style="text-align: justify;">د هغه په خبره، د هغوی د پلور د کمېدو عمده لامل، په هېواد کې تر سیاسي تحول وروسته د کورنیو کمزوری اقتصاد دی؛ ځکه چې ډېرو خلکو خپل کارونه له لاسه ورکړي دي.</p>
<p style="text-align: justify;">په ورته وخت کې، د میمنې ښار یو بل هټۍوال حبیبالله وایي، له تحول وروسته یي ډېری مشتریانو خپل کاروبارونه له لاسه ورکړي او یا یې هېواد پراېښی دی.</p>
<p style="text-align: justify;">نوموړي هم د خپل پلور د کمښت لامل د هېوادوالو اقتصادي ستونزې و بللې.</p>
<p style="text-align: justify;">د میمنې ښاروال داملا محبالله موفق وایي چې له اړوندو ارګانونو جوړ یو کمېسیون رامنځته شوی څو په ښار کې نظم رامنځته کړي، ټول اصناف په ځانګړي ډول لیلامي پلورونکي به هغه ځای ته و لېږدوي چې مخکې ورته ټاکل شوی دی.</p>
<p style="text-align: justify;">نوموړي وویل، د سړې هوا له امله یې لیلامي پلورونکو او کسبهکارانو ته د پارک په شاوخوا کې زمینه برابره کړې وه او د هوا له ښه کېدو وروسته به د اصنافو لېږد پیل کړي.</p>
