د ایران د دفاع وزارت پر ځینو تاسیساتو هوایي بریدونه شوي

[restrict paid="true"]

<p style="text-align: justify;">اټلانتا (پژواک، ۹ سلواغه ۱۴۰۱): د ایران د دفاع وزارت پر ځینو تاسیساتو د بې‌پیلوټه الوتکو له خوا هوایي بریدونه شوي دي.</p>

<p style="text-align: justify;">د ایران د دفاع وزارت د سلواغې په ۹مه په یوه خبرپاڼه کې ویلي چې دا بریدونه تېره شپه شاوخوا ۱۲ بجې شوي دي.</p>

<p style="text-align: justify;">سرچینې زیاته کړې چې په اصفهان کې د دفاع وزارت اړوند پر یوې ودانۍ هوایي برید شوی، خو ځاني زیان یې نه درلود.</p>

<p style="text-align: justify;">یاد وزارت دا د «کوچنۍ مرغۍ» برید بللی چې په وینا یې، د دفاع وزارت پر یوه بنسټ شوی دی.</p>

<p style="text-align: justify;">ایران وايي، له دغه بریده څو ساعته مخکې د اصفهان د "مهماتو" د تولید په یوه کارخونه کې یوه لویه چاودنه هم شوې ده.‌</p>

<p style="text-align: justify;">دا چاودنه د ایران د دفاع وزارت اړوند د وسلو جوړولو یوه کارخونه کې شوې چې ویل کېږي چا ته په کې زیان نه دی اوښتی.</p>

<p style="text-align: justify;">د دفاع وزارت خبرپاڼه زیاتوي، له نېکه مرغه په دې کې څوک نه دي وژل شوي، خو دوه نورې بریدګرې بې پیلوټه الوتکې ویشتل شوې دي‌.‌</p>

<p style="text-align: justify;">د ایران دفاع وزارت د دغه برید د پړې ګوته کوم هېواد یا ډلې ته نه ده نیولې.</p>

<p style="text-align: justify;">تر اوسه ایران نه دي ویلي چې برید د کومې ډلې یا هېواد له خوا ترسره شوی او نه هم تر اوسه کوم چا یا ډلې د دغه برید مسوولیت منلی دی.‌</p>

<p style="text-align: justify;">بلخوا په ټولنیزو رسینو کې ایرانیانو لیکلي چې په څو نورو سیمو کې هم ورته چاودنې او بریدونه شوي، خو تر اوسه ازادو سرچینو نه دي تایید کړي.</p>

<p style="text-align: justify;">دا په داسې حال کې ده چې دوه ورځې مخکې د اسراییل د یروشلم ښار د یهودیانو پر یوه عبادتځای د یوه وسله وال کس په برید کې اووه کسان وژل شوي وو.</p>

<p style="text-align: justify;">له دغه برید وروسته د اسراییلو صدراعظم پر ایران تور لګولی و چې دغه برید یې ترسره کړی او د غچ اخیستلو ګواښ یې کړی و.</p>

[/restrict]