<p style="text-align: justify;">کابل (پژواک، ۹ وری ۱۴۰۳): په کابل کې د ناروې سفیر د ریاستالوزراء له سیاسي مرستیال سره په لیدنه کې ویلي، هېواد یې د ا.ا د مخالفینو ملاتړ نه کوي او له اروپايي ټولنې او م.م سره په ګډه کار کوي چې د اقلیمي بدلون برخه کې له افغانانو سره مرستې وشي.</p>
<p style="text-align: justify;">له ارګه خپره شوې <strong><a href="https://twitter.com/ARG_1880/status/1772993038903574851">خبرپاڼه</a> </strong>کې راغلي چې د ریاستالوزراء سیاسي مرستیال مولوي عبدالکبیر پرون په کابل کې د ناروې له سفير پاول کلومن بېکین او مل پلاوي سره ولیدل.</p>
<p style="text-align: justify;">خبرپاڼه کې راغلي، په دې لیدنه کې سفیر د افغانستان او ناروې اړیکو ته په اشاره وویل، دغه هېواد له اسلامي امارت سره ښې او اوږدې اړیکې لري.</p>
<p style="text-align: justify;">د یاد هېواد سفیر وویل، په افغانستان کې د داعش په ګډون یو شمېر ډلې ځپل شوې او پخوانی ځواک یې له لاسه ورکړی دی.</p>
<p style="text-align: justify;">د ناروې سفير له پاکستانه د افغانانو ایستل د اندېښنې وړ وبلل او هیله یې څرګنده کړه چې د کابل او اسلاماباد په اړیکو کې مثبت بدلونونه ولیدل شي.</p>
<p style="text-align: justify;">هغه دغه راز وویل، دا چې تر اوسه نړۍ د افغانستان حکومت پر رسمیت نه دی پېژندلی، دا د دواړو په ګټه نه دی او زیاته یې کړه، په دې برخه کې د پرمختګ لپاره لا ډېرو هڅو ته اړتیا ده.</p>
<p style="text-align: justify;">د ناروې سفیر زیاته کړه، دوی د اسلامي امارت د مخالفینو ملاتړ نه کوي او په خبره یې، ناروې له اروپايي ټولنې او ملګرو ملتونو سره په ګډه کار کوي چې د اقلیمي بدلون برخه کې له افغانانو سره مرستې وشي.</p>
<p style="text-align: justify;">خبرپاڼې کې د جزئیاتو له ورکولو پرته د ریاستالوزراء سیاسي مرستیال له قوله لیکل شوي: «د ځينو لورو له خوا چې کله ناکله د امنیتي پېښو پړه پر اسلامي امارت وراچول کېږي، له افغانستان سره هیڅ تړاو نه لري، غوره به وي چې هېوادونه خپل داخلي مسایل حل کړي او خپل امنیت وساتي.»</p>
<p style="text-align: justify;">مولوي عبدالکبیر دغه راز زیاته کړه، اسلامي امارت د ملي ګټو په رڼا کې د متوازن سیاست په لرلو سره له ټولو قدرتونو سره مثبت تعامل غواړي.</p>
<p style="text-align: justify;">سیاسي مرستیال د چاپېریالساتنې برخه کې وویل، افغانستان د اوبو مدیریت او ځنګلونو رغونې برخو کې همکارۍ ته اړتیا لري.</p>
