<p style="text-align: justify;">کابل (پژواک، ۸ وږی ۱۴۰۳): د ریاستالوزراء سیاسي معاونیت د دفتر رییس د یوناما د سیاسي برخې له مشر سره لیدنه کې ویلي چې اسلامي امارت بشري حقونو ته د اسلام په رڼا کې درناوی لري او په افغانستان کې قوانین د دین پر اساس جوړېږي.</p>
<p style="text-align: justify;">له ارګه په خپره شوې خبرپاڼه کې راغلي چې د ریاستالوزراء سیاسي معاونیت د دفتر عمومي رییس مولوي ذاکرالله ذاکر پرون په کابل کې د یوناما د سیاسي برخې له مشر سکاټ سمېټ سره ولیدل.</p>
<p style="text-align: justify;">سمېټ ویلي، د دوحې په درېیمه ناسته کې د اسلامي امارت د ګډون مخالف هېوادونه د ناستې له پایلو خوښ وو او ډېر موضوعات ورته روښانه شوي دي.</p>
<p style="text-align: justify;">د هغه په خبره، د یوناما او اسلامي امارت ترمنځ د باور ښه فضأ شته او هیله ده چې له نړۍ سره هم د اسلامي امارت تعامل پیاوړی او پر نورو اغېزناکو چارو هم فکر او کار وشي.</p>
<p style="text-align: justify;">نوموړي څرګنده کړې چې یوناما به په نږدې ورځو کې د ملګرو ملتونو امنیت شورا ته د افغانستان په اړه خپل راپور وړاندې کړي.</p>
<p style="text-align: justify;">د ریاستالوزراء سیاسي معاونیت د دفتر عمومي ريیس ویلي، ناستې او بحثونه د اسلامي امارت او نړۍوالې ټولنې د نږدې کېدو سبب کېدای شي او افغان حکومت غواړي شته مسایل د خبرو له لارې حل کړي.</p>
<p style="text-align: justify;">ذاکر زیاته کړې، اسلامي امارت په هېواد کې د مېشتو ټولو بهرنیو ډیپلوماټانو کار ته احترام لري او له هغوی هم غواړي چې شته اصولو ته درناوی ولري.</p>
<p style="text-align: justify;">د هغه په خبره، اسلامي امارت بشري حقونو ته د اسلام په رڼا کې درناوی لري او په افغانستان کې قوانین د دین پر اساس جوړېږي چې د اندېښنې وړ موضوع نه ده.</p>
<p style="text-align: justify;">ذاکر د دوحې درېیمې ناستې د ژمنو عملي کېدو یادونه وکړه، ویې ویل، اسلامي امارت له نړۍ سره خبرو او اړیکو ته لومړیتوب ورکوي.</p>
