کابل (پژواک، ۲ مرغومی ۱۴۰۳): کابل کې د کار او ټولنیزو چارو وزارت اړوند د څرخي پله د فني او حرفوي زدهکړو په مرکز کې له نشهیي توکو رغېدلو څه باندې ۵۰۰ کسانو ته د فني او حرفي زدهکړو پروګرام پیل شو.
یادو کسانو ته دغه پروګرام نن د کابل ښار د څرخي پله د فني او حرفوي زدهکړو په مرکز کې پیل شو.
د کار او ټولنیزو چارو وزارت ویاند سمیعالله ابراهیمي د اړوند موضوع په اړه پژواک خبري اژانس ته وویل، یوه کمېټه موظفه شوې څو پر نشهیي توکو روږدي کسان راټول او له درملنې وروسته یې د دغه وزارت اړوند مرکزونو ته د فني او حرفوي زدهکړې لپاره معرفي کړي.
دی وايي چې نن د کابل څرخي پله د فني او حرفوي زدهکړو په مرکز کې له نشهیي توکو رغېدلو څه باندې ۵۰۰ کسانو ته د فني او حرفي زدهکړو شپږ میاشتنی پروګرام پیل شو.
هغه زیاته کړه، دغو کسانو ته په پنځو برخو بوټ جوړونې،، جامو او بيکونو ګنډلو، د برېښنایي وسایلو ترمیم او ساختماني ویرنګکاري برخو کې زدهکړې ورکول کېږي.
د کار او ټولنیزو چارو وزارت د کار چارو مرستیال مولوي محمدزاهد احمدزي په ننني پروګرام کې وویل، د اسلامي امارت مشرتابه د دې هوډ لري چې په افغانستان کې باید هېڅ روږدی کس له درملنې پاتې نه شي.
دی وایي، دغه وزارت هڅه کوي څو په لویو زونونو کې هم له نشهیي توکو رغېدلو کسانو ته د فني او حرفوي زدهکړو مرکزونه فعال کړي.
بل لورته، الهام چې د پکتیا ولایت اصلي اوسېدونکی دی او د نشهيي توکو له کارولو رغېدلی پژواک ته یې وویل، اته کاله مخکې یې د ځینو ستونزو له امله د نشهیي توکو کارولو ته مخه کړې وه.
دی وايي، خوښ دی چې درملنه یې وشوه او غواړي د بیکونو جوړولو برخه کې فني او حرفوي زدهکړې وکړي.
هغه له ټولو ځوانانو وغوښتل چې د نشهیي توکو کارونې ته زړه ښه نه کړي.
د کار او ټولنیزو چارو وزارت د معلوماتو له مخې، له دې مخکې د دغه وزارت اړوند فني او حرفوي زدهکړو له مرکزونو ۴۰۰۰ له نشهیي توکو رغېدلي کسان فارغ شوي دي.
د یادونې ده، د کار او ټولنیزو چارو وزارت له لوري د کابل څرخي پله د فني او حرفوي زدهکړو مرکز د ۱۴۰۲ لمریز کال د چنګاښ په ۱۸مه د ۳۰ میلیون افغانیو په لګښت جوړ شوی دی.
GET IN TOUCH
NEWSLETTER
SUGGEST A STORY
PAJHWOK MOBILE APP