کونړ کې یوه ښځه د خپل خاوند له دوه میاشتني بنده ازاده شوه

اسعداباد (پژواک، ۲۳ مرغومی ۱۴۰۳): کونړ کې امنيتي مسوولین وايي چې تېره ورځ یې د چپې درې ولسوالۍ په درګۍ سیمه کې یې د مشرقې په نوم یوه مېرمن چې د خپل خاوند له لوري له شکنجې وروسته په یوه خونه کې بندي شوې وه، ازاده کړې ده.

د کونړ د چپې درې ولسوالۍ امنیه قوماندان مولوي عبدالبصیر له رسنیو سره په خبرو کې وویل، تېره ورځ یې په درګۍ سیمه کې یوه مېرمن د خپل خاوند له بنده ازاده کړې ده.

هغه وویل: «موږ اطلاعات ترلاسه کړل چې د درګۍ په سیمه کې د مشرقې په نوم یوه مېرمن د خپل خاوند حبیب سید له لوري شکنجه شوې او له تېرو دوو میاشتو راهیسې په یوه خونه کې زنداني شوې ده.»

هغه زیاته کړه چې یاده مېرمن د ډېرې شکنجې له امله پر رواني ناروغۍ اخته شوې او اوس‌مهال په روغتون کې تر درملنې لاندې ده.

د نوموړي په خبره، د یادې مېرمنې خاوند نیول شوی او له لومړنیو څېړنو وروسته به یې عدلي او قضایي ارګانونو ته وسپاري.

بلخوا، د مشرقې ورور عبدالرحیم پژواک خبري اژانس ته وویل، له خور سره یې د خاوند له لوري ظلم شوی او غوښتنه کوي چې حکومت باید سخته سزا ورکړي.