کابل (پژواک، ۲۸ غویی ۱۴۰۴): کابل کې د چین سفیر له ګاونډیو هېوادونو راستنېدونکو افغان کډوالو ته د ۱۶۰ کورونو جوړولو او له هغوی سره د ۳۰ میلیونه ینه نغدي مرستې خبر ورکړی دی.
له ارګه په خپره شوې خبرپاڼه کې لیکل شوي، د ریاستالوزراء اداري مرستیال مولوي عبدالسلام حنفي نن له غرمې مخکې په کابل کې د چین له سفیر جاوشینګ او مل پلاوي سره وکتل.
په خبرپاڼه کې راغلي، دغه کتنه د افغانستان او چین ترمنځ د اړیکو او همکاریو د پیاوړتیا او پراختیا په موخه ترسره شوې ده.
د چین سفیر جاو شینګ د دواړو هېوادونو د دوستانه اړیکو یادونه کړې او ویلي یې دي چې تر اوسه په مختلفو برخو کې د دواړو لورو اړیکي په ښه ډول پر مخ تللې او د پراختیا په حال کې دي.
هغه د اسلامي امارت له خوا د ګاونډيو هېوادونو له لوري د راستنېدونکو کډوالو د چارو د ښه مدیریت ستاینه کړې او دغه راز یې له کډوالو سره د چمتو شوو ۱۶۰ کورونو او همدارنګه د ۳۰ میلیونه ینه نغدي مرستې خبر ورکړی دی.
نوموړي ویلي، په مختلفو برخو کې به له افغانانو سره د چین مرستې دوام ولري.
جاو شینګ دغه راز په افغانستان کې د چیني پانګهوالو او سوداګرو پانګونې ته په اشاره ویلي، د چیني سوداګرو د سوداګرۍ او پانګونې له امله به افغانانو ته د کارموندنې ډېر فرصتونه برابر شي.
سرچینې لیکلي، په دې لیدنه کې د ریاستالوزراء اداري مرستیال مولوي عبدالسلام حنفي له افغان کډوالو سره د چین د مرستې له امله مننه کړې او ویلي یې دي، د افغانستان او چین اړیکي پیاوړې او دوستانه دي او اسلامي امارت په مختلفو برخو کې د دغو اړیکو د پیاوړتیا غوښتونکی دی.
هغه زیاته کړې، په افغانستان کې پانګونې ته ښه زمینه برابره شوې او اسلامي امارت د هر ډول بهرنۍ پانګونې ملاتړ او هرکلی کوي او شرکتونو او پانګهوالو ته ټولې لازمې اسانتیاوې برابروي.
د معلوماتو له مخې، د چین سفیر د خپل دولت له لوري د ریاستالوزراء اداري مرستیال ته بلنه ورکړې چې د چین ـ سوېلي اسیا راتلونکي نهم نندارتون (CSA) کې ګډون او وینا وکړي.
GET IN TOUCH
NEWSLETTER
SUGGEST A STORY
PAJHWOK MOBILE APP