کندهار (پژواک، ۵ وږی ۱۴۰۵): د کندهار امنیه قومانداني وایي چې د دغه ولایت د شاوليکوټ ولسوالۍ اړوند د دهلې بند اوبو کې د کښتۍ چپه کېدو له امله یوه پلار له خپلو څلورو اولادونو سره ژوند له لاسه ورکړی.
د کندهار د امنیې قوماندانۍ ویاند ملا اسدالله جمشید د پنجشنبې په ورځ پژواک ته وویل، دغه پېښه تېره ورځ مازدیګر شوې ده.
هغه زياته کړه، په پېښه کې د نوراحمد په نوم یو کس او د هغه څلور کوچني اولادونه، چې دوه زامن او دوه لوڼې وې، ژوند له لاسه ورکړی او د هغه د ورور یوه لور ژغورل شوې ده.
عیني شاهدان هم وایي، نوراحمد له خپلو پنځو اولادونو سره د چکر لپاره دهلې بند ته تللی و چې کښتۍ یې په اوبو کې چپه شوې ده.
دهلې بند ته ګڼ خلک د تفریح لپاره ورځي او ځیني یې په کوچنیو کښتیو کې د بند اوبو کې چکر وهي؛ خو د سیمې اوسېدونکي وایي، په دغو کښتیو کې د ژغورنې واسکټونه او د بېړنیو پېښو پر مهال د خلکو د ژغورلو نور اړین امکانات نشته.
