کابل (پژواک) – د امریکا د خزانې وزارت په کاناډا کې د اسعارو تبادلې اته شرکتونه له دې امله تحریم کړي چې د دغه هېواد په خبره، له ایراني بنسټونو سره یې د امریکا د مالي بندیزونو ماتولو برخه کې مرسته کړې او په ځینو مواردو کې یې د رایان ویدینګ په نوم د یوه کس، چې د نشهيي توکو د قاچاق یوې شبکې د مشرۍ تور دی پرې، د جرمي عوایدو په سپینولو کې همکاري کړې ده.
د کاناډا سيبيسي خبري شبکې راپور ورکړی چې د امریکا د خزانې وزارت پرون (جمعه) اعلان وکړ چې دغه اته شرکتونه د کاناډا په انټاریو او برېټیش کولمبیا ایالتونو کې فعالیت لري او ایراني بنسټونو ته یې د مالي خدمتونو په وړاندې کولو سره له مالي محدودیتونو د تېرېدو برخه کې مرسته کړې ده.
د دغه وزارت د معلوماتو له مخې، ځینو دغو شرکتونو د ایران د ریال او نورو اسعارو په ډیجیټلي شتمنیو، د کریپټو اسعارو په ګډون، د بدلولو په برخه کې هم رول درلود؛ هغه اقدام چې د امریکايي چارواکو په وینا، د جرمي فعالیتونو له لارې د ترلاسه شوو عوایدو سپینولو لپاره ترسره شوی دی.
د امریکا د خزانې وزیر سکاټ بېسېنټ په یوه اعلامیه کې ویلي: «کاناډا باید د هغو ناقانونه مالي اسانتیا برابروونکو لپاره خوندي پناهځای نه وي چې د ایران پر حکومت او د هغه اړوندو ځواکونو د بندیزونو ماتولو برخه کې خدمتونه وړاندې کوي.»
د امریکا د خزانې وزارت زیاته کړې چې دغه اقدام د واشنګټن د هغو پراخو هڅو یوه برخه ده چې موخه یې «د ایران حکومت او سپاه پاسداران د مالي سرچینو برابرولو اقتصادي لارو بندول» دي.
د امریکا د خزانې وزارت د تحریم شوو اتو کاناډايي شرکتونو نومونه هم اعلان کړي چې په انتاریو او برېټېش کولمبیا ایالتونو کې فعالیت لري.
دا پراګراف په روانه او معیاري بڼه داسې لیکلای شئ:
د راپور له مخې، په دغو شرکتونو کې په انتاریو کې «Diverse Trade Inc.» چې د «Million Exchange» په نوم فعالیت کوي، «Top PC Technician Inc.»، «2397639 Ontario Ltd.» چې د «Farah Exchange» په نوم فعالیت کوي، «CCC Inc.»، «B Galaxy Inc.» چې د «Cryptoyal» په نوم پېژندل کېږي، او «Darvish Exchange» شامل دي. همدارنګه په برېټش کولمبیا کې «1380079 BC Limited» چې د «Amin Exchange» په نوم فعالیت کوي، او «NIA Nations Currency Ltd.» هم د بندیزونو په لېست کې شامل شوي دي.
د امریکا د خزانې وزارت په اعلامیه کې راغلي چې دغو شرکتونو ایراني بنسټونو ته د مالي خدمتونو په وړاندې کولو کې مرسته کړې او ځینو یې د دې لپاره چې ونه پېژندل شي، خپل نومونه او پتې بدلې کړې دي.
د راپور له مخې، دغه بندیزونه د یادو شرکتونو د امریکا پر ډالري مالي نظام د لاسرسي د بندېدو لامل کېږي؛ یعنې په امریکا کې د هغوی احتمالي شتمنۍ کنګل کېږي او له امریکايي وګړو او بنسټونو سره هر ډول راکړه ورکړه ورباندې منع کېږي.
د امریکا د خزانې وزارت په اعلامیه کې راغلي چې له تحریم شوی اتو شرکتونو درې یې د پخواني المپیکي ورزشکار رایان ویدینګ، چې اوس د نشهيي توکو د قاچاق د یوې شبکې پر مشرۍ تورن دی، د پیسو په پټولو کې مرسته کړې ده.
د اعلامیې له مخې، یادو شرکتونو په لویه کچه نغدې پیسې پر ډیجیټلي شتمنیو بدلې کړې او په دې توګه یې د ویدینګ د فعالیتونو اړوند عوایدو په سپینولو کې ونډه لرلې ده.
د امریکا د خزانې وزارت زیاته کړې چې دغو شرکتونو د ویدینګ له نیول کېدو مخکې چې د میلیونونو ډالرو په ارزښت ډیجیټلي شتمنۍ بهرنیو هېوادونو ته لېږدولې دي.
سيبيسي خبري شبکې ویلي چې د دغو تورونو په اړه یې د رایان ویدینګ له مدافع وکیل سره د نظر اخیستو لپاره اړیکه نیولې، خو د راپور تر خپرېدو یې ځواب نه دی ترلاسه کړی.
دغه بندیزونه په داسې حال کې اعلانېږي چې د ډونالډ ټرمپ ادارې د روان کال په اګسټ کې له ایران سره سوداګریزې اړیکې لرونکو بنسټونو او هېوادونو پر وړاندې د امریکا د ثانوي بندیزونو لمن پراخه کړې وه. دغه اقدام پر تهران د اقتصادي فشارونو زیاتولو په موخه ترسره شوی و.
سکاټ بېسېنټ هغه مهال ویلي وو چې د واشنګټن موخه د ایران د حکومت د مالي سرچینو برابرولو د ټولو اقتصادي لارو بندول دي، څو تهران منزوي شي.
