د ډېټا ژورنالېزم راپورونه

تېره اونۍ، تورخم کې نښتو مرګ‌ژوبله واړوله او هلته د پژواک د خبریال په ګډون دوه افغان خبریالان هم ټپیان شول او اوچا، جاپان او ډنمارک له افغانستان سره د مرستې لپاره څه باندې ۶۲ میليون ډالر ځانګړي کړل.

تېره اونۍ، ا.ا وویل چې د نړۍوالې جنايي محکمې په نامه جوړښت ته ځان مکلف نه بولي، اوای‌سي له افغانستان سره پر واقعیتونو ولاړ تعامل ټینګار وکړ، پاکستان اعلان وکړ چې له اسلام‌اباد او راولپندۍ څخه افغان کډوال وباسي او د ۱۷ هېوادونو ښځينه بهرنیو چارو وزیرانو په افغانستان کې پر ښځو «لګول شوي محدودیتونه» اندېښمنوونکي وبلل.

تېره اونۍ، اسلو او کابل د ډيپلوماټیکو اړیکو پر پراختیا خبرې وکړې، چین وویل چې له کابل سره یې اړیکو کې ښه‌والی راغلی او د امنیت شورا کې په افغانستان کې د داعش په اړه اندېښنې وښودل شوې، خو ا.ا وویل چې داعش افغانستان کې ځواک نه لري.  

تېره اونۍ، بېګم راډیو وتړل شوه، له افغانستانه ازبکستان ته وړل شوې اووه بلک‌هاک چورلکې امریکا ته سپارل شوې، سیګار ادعا وکړه چې په افغانستان کې ځینې بهرنۍ ډلې فعالیت لري، خو ا.ا رد کړه او جنوبي کوریا له افغانستان سره درې میلیون امریکایي ډالر مرسته اعلان کړه.

د پژواک د خپرو شوو راپورونو له مخې، په افغانستان کې د روان لمریز کال په لومړیو لسو میاشتو کې د ۶۳۹ ترافیکي پېښو له امله ۷۶۷ کسانو ژوند له لاسه ورکړی او ۲۰۰۸ نور ټپیان شوي، خو د دې مودې د وروستیو پنځو میاشتو پر مهال ترافیکي پېښو کې د مرګ‌ژوبلې کچه نږدې ۳۲ سلنه کمه شوې ده.

تیره اونۍ د جرمونو نړۍوالې محکمې یوه څارنوال له دې محکمې د ا.ا مشر او سترې محکمې د رییس د نیولو غوښتنه وکړه، خو ا.ا د یادې محکمې د څارنوال تورونه بې‌بنسټه وبلل او په کلکو ټکو یې وغندل، همداراز یوناما د نجونو پر زده‌کړو د بندیز دوام د اندېښنې وړ وباله، اروپايي ټولنې او ډنمارک له افغانستان سره ۵۸ میلیون ډالر مرسته اعلان کړه.

تېره اونۍ، جو بایډن وویل چې افغانستان امریکا ته ګواښ نه دی، ځینو هېوادونو له ا.ا وغوښتل چې پر ښځو لګول شوي محدودیتونه لرې کړي او ایټاليا، سویس او جاپان له افغانستان سره ۸.۶ میلیون ډالر مرسته اعلان کړه

د تېر لمریز کال له پیل راهیسې افغانستان کې د وچکالۍ، زلزلو، سېلابونو او نورو طبیعي پېښو له امله څه باندې ۲۴ زره کورنۍ بې‌ځایه شوې دي چې تر نیمایي ډېرې یې په هرات او هلمند کې دي.  

تېره اونۍ، بېلابېلو بنسټونو له پاکستانه وغوښتل چې د افغان کډوالو د نیولو او ځورولو لړۍ ودروي، پاکستان د کونړ پر ځینو سیمو راکټي بريدونه وکړل او ټرمپ ادعا وکړه چې د بایډن حکومت ا.ا ته میلیاردونه ډالر ورکړي، خو ا.ا او د امریکا حکومت دغه ادعا رد کړه.

تېره اونۍ، باکو له کابل سره د سیاسي تعامل پر پراختیا ټينګار کړی، د خوست علي‌شېر ولسوالۍ کې له ډیورنډ کرښې سره د افغان او پاکستاني ځواکونو ترمنځ نښته شوې او د اقتصاد وزارت یو ځل بیا په نادولتي موسسو کې د ښځو د کار پر بندیز ټينګار کړی، خو م.م یې د لغوه کېدو غوښتنه کړې.

د افغانستان د عامې روغتیا وزارت د وړاندې شوو شمېرو له مخې، په ۲۰۲۴ کال کې په هېواد کې د کرونا ناروغانو شمېر د ۲۰۲۳ کال په پرتله څه باندې ۴۱ سلنه او له دې ناروغۍ د مړه شوو کسانو شمېر ۴۲ سلنه کم شوی دی.

تېره اونۍ، سعودي عربستان په کابل کې بیا خپل سفارت پرانیست، پر برمل ولسوالۍ د پاکستان هوایي برید کې ۹۲ کسانو ته مرګ‌ژوبله واوښته او د افغانستان ملي دفاع وزارت وویل چې تېره شپه یې په انتقامي برید کې د ډیورند فرضي کرښې هغه غاړه ځیني مرکزونه په نښه کړي دي.