نړیوال خبرونه

ټاکل شوې وه سبا د ایران او امریکا ترمنځ د اټومي پروګرام په اړه د غیرمستقیمو خبرو اترو شپږم پړاو د عمان هېواد په کوربه‌توب ترسره شي، خو د ایران د بهرنیو چارو وزارت ویاند اعلان کړی چې د مقابل لوري د وروستي اقداماتو له امله دغه مذاکرات بې‌معنا شوي دي.

ایران کې پر ځینو موخو د اسرائیل له وروستیو بریدونو وروسته د ملګرو ملتونو امنیت شورا په خپله بېړنۍ ناسته کې په هغې سیمه کې - چې ورځ تر بلې له زیاتېدونکو جګړو سره مخ ده – د ناورین پراخېدو مخنیوي لپاره د ترینګلتیا کمېدو او ډيپلماتیکو هڅو ډېرېدو پر اړتیا ټینګار کړی دی.

د راپورونو له مخې، ایران د امنیت شورا غونډه کې امریکا د اسرائیل په بریدونو کې شریکه بللې، ایران هم پر اسرائیل بریدونه کړي او د روسیې ولسمشر د اسرائیل بریدونه غندلي او د دواړو خواوو ترمنځ یې منځګړیتوب ته چمتووالی ښودلی دی.

د ملګرو ملتونو سرمنشي د ایران پر اټومي تاسیساتو د اسرائیل د برید په اړه اندېښنه څرګنده کړې او له دواړو لورو یې د زغم غوښتنه کړې ده.

ایراني رسنیو راپور ورکړی چې پر ایران د اسرائیل د بریدونو له امله د دغه هېواد د سپاه پاسداران عمومي قوماندان او یو شمېر نورو پوځي چارواکو او پوهانو خپل ژوند له لاسه ورکړی دی.

ایراني رسنیو راپور ورکړی چې د ایران پر ځينو تاسیساتو د اسرائیل د بریدونو له امله د ایران هوايي حریم تر بلې خبرتیا د هر ډول الوتنو پرمخ تړل شوی دی.

اسرائیلي چارواکي وايي، د ایران پر ځینو تاسیساتو یې بریدونه کړي او د ایران مذهبي مشر ویلي چې «صهیونیستي رژیم» باید د سختې سزا په تمه واوسي.

د ملګرو ملتونو د کډوالۍ عالي کمېشنري وایي چې نړۍ کې څه باندې ۱۲۲ میلیونه کسان د جګړو او طبیعي پېښو له امله بې‌ځایه شوي دي.

امریکايي رسنیو پر ایران د پوځي برید لپاره د اسرائیل د چمتووالي خبره کوي، تهران هم په سیمه کې د امریکا د پوځي اډو په نښه کولو خبرداری ورکړی او د دغو ترینګلتیاوو له امله، متحده ایالتونو خپلو کارکوونکو ته له بغداده د وتلو امر کړی دی.

د راپورونو له مخې، د کولمبیا په سوېل لویدیځ کې د پولیسو مرکزونو ته نږدې په چاودنو او بریدونو کې د پولیسو په ګډون اووه کسان وژل شوي او ۱۲ نور ټپیان دي

له تېرو پنځو ورځو راهیسې د امریکا په لاس‌انجلس کې د ناقانونه کډوالو د نیولو پر سر پیل شوي اعتراضونه لا هم دوام لري خو پولیسو د دغه ښار په ځينو برخو کې ګرځبدنیز اعلان کړی او ویلي یې دي چې سرغړوونکي به ونیول شي.

بریتانیا، اسټرالیا، کاناډا، نیوزیلنډ او ناروې د اسرائیل پر دوو وزیرانو د غزې په اړه د څرګندونو له امله بندیزونه ولګول