<p style="text-align: justify;">کابل (پژواک، ۱۶ سلواغه ۱۴۰۴): د امریکا ولسمشر وایي چې د چین له ولسمشر سره یې په یوه ټیلیفوني اړیکه کې د سوداګرۍ، تایوان، د روسیې او اوکراین د جګړې او د ایران د اوسني وضعیت په ګډون پر مهمو موضوعاتو خبرې کړې دي.</p>
<p style="text-align: justify;">ډونالد ټرمپ په ټروت سوشیل ټولنیزې شبکې کې د یوه پیغام په خپرولو سره د دواړو لوریو خبرې «عالي» بللې دي.</p>
<p style="text-align: justify;">هغه زیاته کړې: «هر څه ډېر مثبت دي. له چین سره اړیکې او د چین له ولسمشر شيجینپینګ سره زما شخصي اړیکه ډېره ښه ده او دواړه پوهېږو چې د دې ساتل څومره مهم دي.»</p>
<p style="text-align: justify;">د الجزیرې د راپور له مخې، د چین ولسمشر شيجینپینګ هم ویلي، چې له متحده ایالاتو سره اختلافونه تر هغه وخته په دوستانه توګه حل کېدای شي، چې پر برابرۍ او متقابل درناوي ولاړ وي.</p>
<p style="text-align: justify;">نوموړي زیاته کړې، چې له تایوان سره یوځای کېدل ـ هغه ټاپو چې چین یې د خپلې خاورې اساسي برخه بولي ـ لا هم د پیکنګ لپاره یو مهم لومړیتوب دی.</p>
