عبدالله عزیزي

د ترکیې په «ګرند کارتال» هوټل کې د اورلګېدنې له امله تر اوسه ۱۰ کسانو ژوند له لاسه ورکړی او ۳۲ نور ټپیان شوي دي.

پاکستاني رسنیو راپور ورکړی چې د خیبر پښتونخوا اعلی وزیر علي امین ګنډاپور ویلي، د افغانستان او پاکستان ترمنځ د ستونزو هواري لپاره به یو ایالتي پلاوی افغانستان ته واستوي.

افغانستان کې د ملګرو ملتونو د خوړو نړۍوال پروګرام وايي چې اروپايي ټولنې له دغه هېواد سره ۱۶ میلیونه او ۵۰۰ زره یورو مرسته کړې ده.

د ایران د اسلامي شورا د صنایعو او کانونو کمېسیون غړي امیر توکلي رودي د افغانستان او ایران ترمنځ د ګډې ځانګړې معدني اقتصادې ساحې د جوړېدو خبر ورکړی دی.

افغانستان کې د بشري او ښځو حقونو لپاره د امریکا متحده ایالتونو د ځانګړې استازې رینا امیري ماموریت پای ته ورسېد.

په افغانستان کې د اروپایي ټولنې استازولي وایي، د افغانستان د داخلي بې‌ځایه شوو او پاکستان، ایران او منځنۍ اسیا هېوادونو کې له افغان ګډوالو د ملاتړ په موخه یې د کډوالو په چارو کې د ملګرو ملتونو له عالي کمېشنرۍ سره هوکړه‌لیک لاسلیک کړی دی.

د اسلامي امارت چارواکي وايي چې د چاپېریال ساتنې موضوع نه باید سیاسي شي او په افغانستان کې د اقلیم له بدلون سره د مبارزې برخه کې د نړۍوالو د همکاریو پر اړتیا ټینګار کوي.

ځینې ډاکتران او د چاپېریال ساتنې برخې پوهان له کورنیو غواړي چې د پلاستیکي کڅوړو پر ځای تکه‌يي او کاغذي کڅوړې و کاروي څو هم د بېلابېلو خطرناکو ناروغیو او هم د چاپېریال له ککړېدو مخنیوی وشي.

د اسلامي نړۍ د ټولنې سرمنشي په داسې حال کې چې ویل یې په اسلام کې د نجونو د زده‌کړو لپاره کوم بندیز نشته زیاته کړه، د نجونو زده‌کړو په اړه له شته ناسمو باورونو سره باید د اسلامي امت ټول علما په ګډه مبارزه وکړي.

امریکايي رسنیو راپور ورکړی چې د کلیفورنیا ایالت په لاس‌انجلس ښار کې د اورلکېدنې له امله د مړه شوو کسانو شمېر ۱۶ ته لوړ شوی او څه باندې ۱۲ زره کورونه هم ویجاړ شوي دي.

د پاکستان لومړي وزیر شهبازشریف د افغانستان لپاره د دغه هېواد ځانګړی استازی محمدصادق د خپل ځانګړي مرستیال په توګه ټاکلی دی.

له المان څخه د افغان کډوالو د ایستلو لړۍ په دوام، د دغه هېواد رسنیو راپور ورکړی چې په ۲۰۲۴ زېږدیز کال کې څه باندې ۱۳۰۰ افغان کډوال له المان څخه ایستل شوي دي.