<p style="text-align: justify;">کابل (پژواک، ۲ سلواغه ۱۴۰۳): افغانستان کې د ملګرو ملتونو د خوړو نړۍوال پروګرام وايي چې اروپايي ټولنې له دغه هېواد سره ۱۶ میلیونه او ۵۰۰ زره یورو مرسته کړې ده.</p>
<p style="text-align: justify;">د خوړو نړۍوال پروګرام په یوه <strong><a href="https://reliefweb.int/report/afghanistan/european-union-contributes-eu165-million-wfp-afghanistan-help-vulnerable-communities-survive-winter">راپور</a> </strong>کې لیکلي چې دغه پیسې به په افغانستان کې زیانمنونکو کورنیو ته د مرستې او د میندو او ماشومانو د تغذیې برخو کې ولګول شي.</p>
<p style="text-align: justify;">سرچینې دغه راز لیکلي چې د افغانستان په لرې پرتو سیمو کې یې د خوراکي توکو وېش هم پیل کړی دی.</p>
<p style="text-align: justify;">د ملګرو ملتونو دغه سازمان ټینګار کړی چې روان ژمی په افغانستان کې ۱۵ میلیون کسان د خوړو د نه درلودو له امله له بېړني حالت سره مخ دي.</p>
<p style="text-align: justify;">د خوړو نړۍوال پروګرام له دې مخکې اعلان کړی و چې د راتلونکو شپږو میاشتو لپاره د خپلو فعالیتونو د دوام لپاره ۱۱۱ میلیون ډالرو ته اړتیا لري.</p>
<p style="text-align: justify;">سرچینه زیاتوي چې اروپايي ټولنې له تېرو دوو کلونو راهیسې له افغانستان سره ۹۲ میلیون او ۵۰۰ زره امریکايي ډالر مرسته کړې ده.</p>
<p style="text-align: justify;">دغه مرسته داسې مهال کېږي چې اروپايي ټولنې درې ورځې مخکې هم په افغانستان کې د داخلي بېځایه شوو او په ایران، پاکستان او د مرکزي اسیا هېوادونو کې د افغان کډوالو د ملاتړ لپاره د ۳۶ میلیون یورو مرستې اعلان وکړ.</p>
