احمدشاه عرفانیار

د صنعت او سوداګرۍ وزارت له یوې بهرنۍ او پنځو کورنيو موسسو سره د نږدې څلور ميليون ډالرو په ارزښت، هوکړه‌لیکونه لاسلیک کړي.

د ملي دفاع وزارت وايي، د دغه وزارت سرپرست په کابل کې د ایران له سفیر سره په لیدنه کې د دوستانه اړیکو د پیاوړتیا، ښه ګاونډیتوب، سوداګرۍ، سرحدي همکاریو او د افغان کډوالو د مسایلو په اړه خبرې اترې کړې دي.

پاکستاني رسینو ويلي، ناپېژانده وسله‌والو د خیبر پښتونخوا په بنو کې د پولیسو پر یوه پوسته برید کړی او اووه پولیس یې له ځان سره بیولي دي.

د امریکا ولسمشر اوکراین ته اجازه ورکړې چې د روسیې پر وړاندې د امریکا اوږد واټن ويشتونکي توغندي وکاروي، خو د روسیې ولسمشر مخکې خبرداری ورکړی چې دا کار به په جګړه کې د امريکا او ناټو د نېغې ښکېلتيا په معنا وي او روسیه به یې په تړاو اړینې پرېکړې وکړي.

د راپورونو له مخې، د غزې د شمال اړوند په بیت‌لاهیا سیمه کې د استوګنې پر یوه ودانۍ د اسرائیلو په هوايي برید کې ۵۰ تنه فلسطینیانو ژوند له لاسه ورکړی چې ۳۰ سلنه یې ماشومان دي.

نن په کابل کې د ۹۷۰ میلیونه افغانیو په پانګونې سره د کمپلو یوې تولیدي فابریکې کار پیل کړ. دغه فابریکه به دا مهال په ورځني ډول د دوو زرو او په راتلونکي کې د پنځو زرو کمپلو د تولید وړتیا ولري.

د ټولګټو وزارت ويلي، که څه هم له دولتي موټرو د ټولپلازا پیسې نه اخیستل کېږي، خو هغه نظامیان چې شخصي پلیټ لرونکي موټر کاروي بايد پر لویو لارو د تګ راتګ پر مهال د ټولپلازا تعیین شوی محصول اړونده مسؤولینو ته ورکړي.

تېره اونۍ ایران وویل چې دوو میاشتو کې زر افغان بندیان ا.ا ته سپاري، خلیل‌زاد بیا ویلي، د دوحې هوکړه کېدای شي د ډونالد ټرمپ او اسلامي امارت تر منځ د تعامل بنسټ شي او ګوترېش له هېوادونو وغوښتل چې د اقلیمي ناورین د مخنیوي لپاره هڅې زیاتې کړي.

نن کابل کې د اوبو اړوند د یوه علمي – څېړنیز سمینار ګډونوالو د اوبو پر مدیریت، سپما او دې برخه کې د سترو تاسیساتو پر جوړېدو ټینګار وکړ ویې ویل چې دغه برخه کې ښه مدیریت کولای شي سیمه‌ییزې اقتصادي همکارۍ لا پياوړې کړي.

امنيتي چارواکي وايي چې په کابل ښار کې د نشه‌يي توکو د پلور، قاچاق او کارولو په تور ۱۳ کسان نیول شوي، دغه راز هرات کې یو کس د قتل په تور نیول شوی دی.

د ملګرو ملتونو د بشري مرستو همغږی‌کوونکي دفتر (اوچا) د اقلیمي بدلون له نړۍوال کنفرانسه غوښتي څو له هغو ټولنو سره پر مرستو تمرکز وکړي چې له لوړې تودوخې  او وچکالۍ سره مخ دي.

د راپورونو له مخې، د امریکا د الاباما ایالت په یوه پوهنتون کې د ډزو له امله یو تن وژل شوی او ۱۶ نور ټپيان شوي.