احمد صهیب حسرت

د پوهنې وزارت وایي، د ۱۴۰۴ لمریز کال عمومي او دیني مدرسو کانکور ازموینې لپاره نوم‌لېکنه پیل شوه او فارغان کولای شي چې د روان کال د مرغومي میاشتې تر پایه نوم‌لېکنه وکړي.

د کانونو او پټرولیم وزارت پلاوي په چین کې د کاني همکاریو د پیاوړتیا کنفرانس کې ګډون کړی او له چیني پانګوالو یې غوښتي چې افغانستان ته د کانونو د سروې، اکتشاف او استخراج عصري ماشینونه ولېږدوي.

وزیرانو شورا پرېکړه کړې چې په لومړي درجه ولایتونو کې دې د رسنیو د فریکونسي جوازونو فیس ۵۰ سلنه کم شي او له دغه مدرکه پر رسنیو د تېرو کلونو پاتې پیسې دې د درېیو کلونو موده کې په قسطونو ورکړل شي.

په اسلام‌اباد کې افغان سفیر د سیمه‌ییزو مطالعاتو انسټېټیوټ کې د خبرو پر مهال ویلي، د افغانستان او پاکستان اقتصادي او سوداګریزې اړیکې باید له امنیتي موضوعاتو سره ونه تړل شي، دغه کار به د ټولو په ګټه وي.

د افغانستان بانک وایي، د یونما مشرې د دغه بانک له رئیس سره په لېدنه کې د هېوادونو په اقتصادي رغښت کې د مالي او بانکي سکتور وده او پرمختګ د ارزښت وړ یاد کړی او په دې برخه کې یې د همکارۍ ژمنه کړې ده.

د افغانستان کرکټ بورډ وایي، افغان ملي لوبډله به د روان کال په ‌ډسمبر میاشت کې د زېمبابوې په کوربتوب د نړۍوالو شل اوریزو، یو ورځنیو او ټېسټ سیالیو بشپړه لوبلړۍ ترسره کړي.

د اوبو او برېښنا وزارت وایي، د یوه هندي شرکت مسؤلینو د دغه وزارت له سرپرست سره په لېدنه کې په افغانستان کې د برېښنا د تولید په پروژو کې پانګونې ته لېوالتیا ښودلې ده.

د کانونو او پټرولیم وزارت وایي، د دغه وزارت یو پلاوی د چین په رسمي بلنه د کان کیندنې همکارۍ د ترویج کنفرانس کې د ګډون په موخه یاد هېواد ته ولاړ.

د اسرائیلو پارلمان داسې یو قانون تصویب کړی چې له مخې یې له فلسطیني کډوالو د م.م د ملاتړ ادارې فعالیت درول کېږي، خو ملګرو ملتونو دغه کار له نړۍوال قوانینو سرغړونه بللې او وایي چې دغه پرېکړه به بدې پایلې ولري.

په مالیزیا کې افغان سفیر د روسیې او منځنۍ اسیا هېوادونو له سفیرانو سره پر دوه اړخیزو اقتصادي او سیاسي اړیکو او د تعامل پر پراختیا کړې دي.

د افغانستان پخواني ولسمشر حامد کرزي، د پخلاینې مخکینۍ شورا رییس ډاکټر عبدالله او پاکستان، سعودي عربستان او عمان هېوادونو پر ایران د اسرائیلو د تېرې شپې برید غندلی، هغه یې له نړۍ‌والو قوانینو سرغړونه بللې او د کړکېچ پر مخنیوي یې ټینګار کړی دی.

د کابل امنیې قوماندانۍ ویاند وایي، د سینمای‌پامیر په سیمه کې د تېرې ورځې د چاودنې د چاودېدونکو توکو لېږدوونکی کس – چې له امله یې۱۱ تنه ټپیان او یو ماشوم وژل شوی – په ټپي حالت کې نیول شوی دی.