<p style="text-align: justify;">کابل (پژواک، ۱۲ لړم ۱۴۰۳): د کانونو او پټرولیم وزارت پلاوي په چین کې د کاني همکاریو د پیاوړتیا کنفرانس کې ګډون کړی او له چیني پانګوالو یې غوښتي چې افغانستان ته د کانونو د سروې، اکتشاف او استخراج عصري ماشینونه ولېږدوي.</p>
<p style="text-align: justify;">تېره اونۍ (د لړم په اتمه) د کانونو او پټرولیم وزارت وویل چې د دغه وزارت یو پلاوی د چین هېواد په رسمي بلنه د کانې همکاریو د پیاوړتیا کنفرانس کې د ګډون په موخه یاد هېواد ته ولاړ.</p>
<p style="text-align: justify;">د افغانستان د کانونو او پټرولیم وزارت نن پر خپله اېکسپاڼه لیکلي چې افغان پلاوي په دغه کنفرانس کې ګډون وکړ.</p>
<p style="text-align: justify;">سرچينې لیکلي، افغان پلاوي په افغانستان کې د یوه مجهز لابراتوار جوړولو، د کانونو او پټرولیم وزارت د تخنیکي او مسلکي کارکوونکو د ظرفیت لوړولو او د افغانستان د کانونو په سکټور کې د پانګونې نه چینایي پانګوال وهڅول.</p>
<p style="text-align: justify;">خبرپاڼه کې راغلي چې د چین پانګوالو هر یو خپل شرکتونه معرفي کړ او د سرو زرو، مسو، مایکا (ابرک)، تالک، تېلو او ګازو، لیتیم، سرب او جستو، سروې اکتشاف، ډیزاین او د لابراتوارونو جوړولو برخو پانګونې ته یو شمېر شرکتونو خپله لېوالتیا څرګنده کړه.</p>
<p style="text-align: justify;">یاد وزارت لیکلي چې یادو شرکتونو په افغانستان کې د کانونو د قرارداد د طرزالعمل د معلوماتو غوښتنه وکړه څو د افغانستان په کانونو کې پانګونه وکړي.</p>
<p style="text-align: justify;">خبرپاڼه زیاتوي، دغهراز یو شمېر افغان پانګوالو چې په دې کنفرانس کې یې برخه اخیستې وه له چینايي پانګوالو څخه د سروې، اکتشاف او کانونو په برخه کې افغانستان ته د عصري ماشینونو د لېږد غوښتنه وکړه.</p>
