نورالله ځاځى

د عدلیې وزارت وايي، د ځمکو د غصب مخنیوي کمېسیون هېواد کې د اهل‌هنود د غصب شوو ځمکو د څېړنې بهیر پیل کړی دی.

د رئیس‌الوزراء په لارښوونه د سختو ورښتونو او درنو واورو له امله د څارویو د تلف مخنيوي لپاره ځانګړي تصامیم ونیول شول.

کابل کې د روسیې سفیر د ریاست الوزراء له سیاسي مرستیال سره په لیدنه کې له نړۍوالې ټولنې غوښتي چې پر افغانستان لګول شوي یو اړخیز او ناسم بندیزونه دې له قید او شرط پرته لرې کړي.

د بهرنیو چارو سرپرست وزیر د ترکمنستان د بهرنیو چارو له وزیر سره د افغانستان په خاوره کې د ټاپي پروژې د کار عملي پیل، هرات ته د دغه هېواد وارداتي برېښنا زیاتوالي، لاجوردو لاري او د رېل پټلۍ پر پراختیا او په دغه برخه کې د ترکمنستان د پانګونې په تړاو خبرې کړې دي.

اسلامي امارت له افغانستانه د شوروي اتحاد ځواکونو د وتلو ۳۵مې کلیزې په مناسبت ویلي چې افغانان سوله غوښتونکي دي او لاهم د استقلال غوښتنې قوي حس په کې موجود دی او متجاوز هېوادونو دې له خپلو ناکامیو درس واخلي.

د اذربایجان سفیر کابل کې د خپل هېواد سفارت پرانیستلو په اړه د یاد هېواد د بهرنیو چارو وزارت رسمي لیک د افغانستان د بهرنیو چارو وزارت سرپرست ته وړاندې کړ.

د عامې روغتیا وزارت سرپرست د ملګرو ملتونو د وګړو صندوق له استازي سره په لیدنه کې د روغتیایي ځالو معیاري کولو، د ګرځنډه روغتیایي ټیمونو پیاوړتیا او د لا زیاتې همغږۍ په اړه خبرې کړې دي.

د بهرنیو چارو وزارت سرپرست د اروپایي ټولنې له ځانګړي استازي سره په لیدنه کې ویلي، اسلامي امارت له ټولو هېوادونو سره د مثبتو اړيکو ساتلو پاليسي لري او هيله‌مند دی چې د دوحې راتلونکې ناسته به د افغانستان او نړۍ ترمنځ د يوه مثبت پړاو پيلامه وي.

د عدلیې وزارت  وایي چې د کابل په بېلابېلو ناحیو کې یې تر څېړنو او ارزونو وروسته یې د ۱۱ خیریه بنسټونو، اتحادیو او شوراګانو دفترونه تړلي دي.

افغانستان لپاره د ملګرو ملتونو ځانګړي همغږي کوونکي فریدون سینزر اوغلو وایي، د دوحې په راتلونکې ناسته کې به د افغانستان په اړه ښې پرېکړې وشي او له دې کنفرانس وروسته به له افغانستان سره د نړۍ په اړیکو کې مثبت بدلونونه راشي.

د چین «شان‌ډونګ‌شینزو» شرکتونو ګروپ استازي د صنعت او سوداګرۍ له سرپرست سره په لیدنه کې د ۱۰ مېګاواټه لمریزې برېښنا د تولید او هر کال د ۵۰۰ زره ټنو تېلو د استخراج او پروسس برخو کې پانګونې ته لېوالتیا ښودلې.

د بهرنیو چارو وزارت سرپرست د «افغانستان د سیمه‌ییزې همکارۍ ابتکار» د یوه ورځنۍ غونډې په پای کې وویل، چې د غونډې ټولو ګډوالو په اتفاق سره په افغانستان کې سوله او ثبات د ټولې سیمې په ګټه یاد کړ.