کابل ( پژواک ۱۰ کب ۱۴۰۲ ): کابل کې د روسیې سفیر د ریاست الوزراء له سیاسي مرستیال سره په لیدنه کې له نړۍوالې ټولنې غوښتي چې پر افغانستان لګول شوي یو اړخیز او ناسم بندیزونه دې له قید او شرط پرته لرې کړي.
له ارګ څخه د کب په ۱۰مه په یوه خپره شوې خبرپاڼه کې راغلي، د ریاست الوزراء سیاسي مرستیال مولوي عبدالکبیر نن په کابل کې د روسیې فدراتيف جمهوريت سفیر دیمیتري ژیرنوف سره وکتل.
سرچینې زیاته کړې ، په دې لیدنه کې د روسیې سفیر ژیرنوف د کابل او مسکو اړیکې ښې یادې کړې او د دغو اړیکو پر پراختیا د ټینګار تر څنګ يې وويل، هیواد به یې له افغانستان سره خپلو مرستو ته دوام ورکړي.
ژیرنوف د افغانستان کنګل شوې شتمنۍ ته په اشارې وویل، له نړۍوالې ټولنې د روسیې حکومت غوښتنه دا ده چې پر افغانستان یو طرفه او ناسم بندیزونه له قید او شرط پرته لرې کړي.
د ریاست الوزراء سیاسي مرستیال مولوي عبدالکبیر، د دواړو هیوادونو ترمنځ د اړیکو پر پراختیا ټينګار وکړ او په نړۍواله کچه د روسیې ستراتېژيکې ونډې ته په کتو یې وویل، له روسیې سره د اسلامي امارت اړیکې مهمې دي.
نوموړي زیاته کړه، اسلامي امارت په نړۍوالو ناستو کې په ځانګړي ډول د دوحې په وروستۍ ناسته کې، د افغانستان په اړه د روسیې د دریځ هرکلی او ملاتړ کوي.
مولوي عبدالکبیر زياته کړه، په افغانستان کې د بشپړ امن په راتګ سره په اقتصادي، ترانزیټي او فرهنګي برخو کې د کابل او مسکو د همکاریو پراختیا ته زمینه برابره شوې ده.
هغه په تېرو شلو کلونو کې فساد او ناامني د غرب د اعمالو زېږنده وبلله او څرګنده یې کړه، اسلامي امارت پر هیواد بشپړ حاکمیت لري او هېچاته اجازه نه ورکوي چې افغان خاوره د ګاونډیو یا نړۍ پر ضد وکاروي او که کوم لوری په دې اړه اندیښنه لري کولای شي په رسمي ډول يې له اسلامي امارت سره شريکه کړي.
د دې کتنې په پای کې، مولوي عبدالکبیر د روسیې سفیر له هڅو په مننې غوښتنه وکړه، چې روسي پانګوال دې په افغانستان کې د پانګونې له مناسبو فرصتونو څخه په استفادې، په ټولو برخو کې پانګونه وکړي.
